Հայաստանի Հանրապետության Կառավարություն

Խորհրդարանի նախկին խոսնակ Սամվել Նիկոյանի արտահայտած այն միտքը, թե առաջիկա տարիների ներքաղաքական իրադարձությունները զարգանալու են վարչապետի պաշտոնի համար մղվող պայքարում, «Գոլոս Արմենիին» դրդել է մի ամբողջ հոդված նվիրել խնդրո առարկային: Թվարկելով վարչապետի դեմ սանձազերծված զանգվածային հարձակումները և մատնանշելով դրանց բացահայտ և սքողված հեղինակներին, թերթը եզրակացնում է, որ այդ «գրոհները» հետ են մղված: Ավելին, վարչապետը «մի քանի հաջող հակահարձակում է իրականացրել» և նկատելիորեն ամրապնդել իր դիրքը:
Միանգամայն այլ կարծիքի է «ՀԺ»-ն: Ազգային վիճծառայության արձանագրած գնաճի տեմպը, որն ավելի մեծ է, քան միջին ամսական աշխատավարձի աճը, թերթին հիմք է տվել կանխատեսելու, որ գնաճի ցուցանիշն ավելի է մեծանալու, ինչն իբր հանգեցնելու է կառավարության հրաժարականին:
Հիշեցնելով, որ սեփականաշնորհում անցկացնելու ժամանակ Հայաստանի իշխանությունը մի շարք սխալներ է գործել, «Գոլոս Արմենիին» ազդարարում է, որ այժմ երկրում «սկսվում է դասակարգային պայքար արտադրության միջոցների անարդյունավետ սեփականատերերի հետ». նկատի է առնվում սեփականության արդյունավետ օգտագործմանը միտված կառավարության որոշման նախագիծը: Ուշագրավ հետևություն է անում «Իրավունքը». «Բայց չէ՞ որ «Արմավիան» ամենևին էլ սնանկ չէ»:
Մինչ «Ժողովուրդի» «լավատեղյակ աղբյուրները փոխանցում են», որ իբր ՀՀ կառավարությանն առընթեր ստեղծվելիք ճարտարապետության կոմիտեն ղեկավարելու է Նարեկ Սարգսյանը, «Գոլոսն» իր փորձագետ-հեղինակների խոսքով բնութագրում է մեզանում իշխող «նեոֆեոդալիզմի դարաշրջանի ճարտարապետությունը»:
«Ազգը» ներկայացրել է Հայաստանի ազատ տնտեսական գոտիներում նախատեսված արտոնությունները, նաև ընդգծել, որ «որևէ ընկերության կողմից ազատ տնտեսական գոտին չի կարող դիտարկվել հարկերից խուսափելու հնարավորություն»: «Հայոց աշխարհը» տեղեկացրել է, որ ըստ ԱՎԾ վիճակագրական տվյալների ընթացիկ տարվա առաջին կիսամյակում տնտեսական ակտիվությունը նվազել է: Թեման արծարծել է նաև «Օրակարգը» («Տնտեսությունն արգելակում է»), որը մի այլ հրապարակման մեջ էլ նշել է, որ «ՎԶԵԲ-ը Հայաստանին կտրամադրի 120 մլն դոլարի վարկային միջոցներ», քանի որ ըստ բանկի նախագահ Սումա Չակրաբարտիի՝ «ցանկացած տնտեսական աճ, որը 2-3%-ից բարձր է, հարգանքի է արժանի»:
«Իրավունքը» արձագանքել է «Ազդակ» ակումբում լրագրողների հետ Ահարոն Ադիբեկյանի երեկվա հանդիպմանը՝ «Ոչ թե տրանսպորտի գինն է բարձր, այլ մեր աշխատավարձերն են ցածր»: Տրանսպորտի թանկացմանն անդրադարձել են նաև «Հրապարակը» («Քյասար՝ 150-ից չեք իջնում, հա՞») և «Հայկական ժամանակը» («Սոցիալական բունտ է հասունանում»):