ուրբաթ, 26 հուլիսի 2013
Նոստրադամուսաբար
Վերլուծելով վերջին օրերին թափ առած քաղաքացիական շարժման ընթացքը, Վերահսկիչ պալատի զեկույցի ժամանակ «ամենակոշտ ելույթներից մեկն ունեցած» պատգամավոր, համատեղությամբ՝ ԲՀԿ մամուլի խոսնակ Տիգրան Ուրիխանյանն ազդարարում է. «այն ամենը, ինչի մասին մենք նախազգուշացրել ենք, սկսում է իրականանալ» («Առավոտ»): Այժմ ընթերցողը խուճապահար մամուլի հավաքածուներն է փորփրում պարզելու, թե էլ ինչ է «նախազգուշացրել» ԲՀԿ-ն իր գործչի շուրթերով: Երևանի քաղաքային տրանսպորտի թանկացման-էժանացման հերոսապատումն են շարադրում «Իրավունքը» («Տրանսպորտի պատմության ուշագրավ առանձնահատկությունները»), «Հրապարակը» («Այս անգամ վարչապետն ասաց՝ Տարոն, սիրուն չի»), «Օրակարգը» («Պարոն Տարոն, ինչպե՞ս ստացվեց»), «ՀԺ»-ն («Պայքարը դեռ նոր է սկսվում»), «Ժողովուրդը» («Քաղաքապետը գերադասեց իր աթոռը»):
Կառավարության երեկվա նիստի քննարկած հարցերին են անդրադարձել «ՀՀ»-ն, «Հրապարակը», «Հայացքը», «ՀԺ»-ն, «Ժամանակը»: Իր էջերից մեկում տեղեկացնելով, որ կառավարությունը որոշել է աջակցել սկսնակ գործարարներին, «Ժողովուրդը» մեկ այլ էջում հավաստում է, որ «վտանգված է փոքր և միջին բիզնեսը»:
Թոշակների վճարման վերջին երկու ամսվա խառնաշփոթը նկարագրվում է «Դելովոյ էքսպրեսի» «Կենսաթոշակային դետեկտիվ» հոդվածում: «Իրատես դե ֆակտոն» ընթերցողից սխալվելու իրավունք է ակնկալում իր հեղինակների համար՝ տպագրելով շարքի առաջին նյութը՝ «Քաղաքատնտեսական շիզոֆրենիա կամ «ԿԲ - Հայաստանի կառավարություն» տանդեմ «Currency board» ռեժիմով»: Նույն թերթը տպագրել է «Նուբարաշեն» ՔԿՀ բանտարկյալ Արմենակ Մնջոյանի նամակը ՀՀ վարչապետին:
