երեքշաբթի, 30 հուլիսի 2013
Օդով և ցամաքով
«Ժողովուրդը» տպագրել է քաղավիացիայի գլխավոր վարչության տվյալները, թե առաջին կիսամյակում որքան մարդ է մեկնել Հայաստանից և որքանը՝ ժամանել: Այս թվերի տարբերությունը թերթին հիմք է տվել հայտարարելու, որ միայն օդով արտագաղթողները մոտ 40 հազար են: Ցամաքային ճանապարհով մեկնածների թիվը թերթը չի հրապարակել:
Մինչ այդ Երևանում բացվել է երկրի առաջին ազատ տնտեսական գոտին («ՀԺ»). նույն թերթը կասկած է հայտնում, որ ուկրաինական «Ռոշեն» ֆիրմայի արտադրանքը, որի ներմուծումը Ռուսաստան արգելվել է բենզապիրենի առկայության հետևանքով, կարգելվի նաև Հայաստանում, քանի որ այդ ընկերության ներկայացուցիչը «Մեգաֆուդ» ընկերությունն է, որը «պաշտոնապես պատկանում է ՊԵԿ նախագահի հորեղբորորդուն»: Նույնպես ազգակցական գործոնի հաշվառմամբ «Ժամանակը» հաղորդում է, որ Մխչյան գյուղի ավագանու անդամ են ՀՀ ԱԺ նախագահի հայրը և եղբայրը: Այս առնչությամբ թերթը հիշեցնում է, որ Աբրահամյանները «մի քանի անգամ օգտվել են կառավարության կողմից սուբսիդավորվող մատչելի դիզվառելիքի հատկացման ծրագրից»:
«ՀԱ»-ն քննության է առել խոշոր հարկատուների ցանկը, ինչպես նաև «Շքեղության հարկի մասին» օրենքում լրացում կատարելու առաջարկը: Հարկային հարցին ամենայն պատասխանատվությամբ է վերաբերվել «Գոլոս Արմենիին»՝ խորհուրդ տալով մեր երկրում կիրառել հարկահանության ավելի արդար համակարգ:
Ընթերցողին մտահոգվելու բավականաչափ հիմքեր է տալիս Արտ. Գեղամյանը՝ հայոց և ռուսաց լեզուներով «Իրավունք» և «Նովոյե վրեմյա» թերթերում միաժամանակ տպագրելով իր «Հայաստանի՝ Եվրոպական միություն մտնելու այլընտրանքը պատերազմն է» հոդվածը:
