ուրբաթ, 2 օգոստոսի 2013
Աշնան դերը մեր կյանքում
Պարզվում է՝ այն չափազանց մեծ է: Եվ եթե «ՀԺ»-ն «կարևոր» աշուն է կանխատեսում ոչ միայն միջազգային չափանիշով («եթե Ասոցացման համաձայնագիրը չստորագրվի, Եվրոպայի հետ ՀՀ-ի հարաբերությունները կտրուկ վատանալու են»), այլև «ներիշխանական» գործընթացների առումով («… աշնանը վարչապետը պաշտոնանկ է արվելու»), ապա «Ազգը» ընդհանրապես առաջիկա աշունը «վերջին տասնամյակի ամենածանր աշունն» է համարում երկրի առջև ծառացած բոլոր խնդիրների համատեքստում: Եվ կրկին ու կրկին քաղաքական գործիչները պատասխանում են մամուլի՝ «կողմնորոշմանը» վերաբերող հարցերին՝ «Ժամանակ», «ՀԱ», «Իրավունք»:
ԶԼՄ-ներն, ինչպես միշտ, ուշադիր են եղել կառավարության երեկվա նիստի հարցերի հանդեպ՝ «Ազգ», «Իրավունք», «Հրապարակ», «Ժողովուրդ»: «Ժամանակը» և «Իրավունքը» փոխանցել են կառավարության շենքի առջև հավաքվածների բողոքը:
«Ազգն» անդրադարձել է կառավարության այս տարվա գերակա խնդիրներին՝ «Նավթի և գազի որոնումից մինչև տավարի մսի արտադրության ավելացում» (01.08.13):
«Հայկական ավիաուղիների» նախկին ղեկավարը «Ժամանակի» միջոցով կարծիք է հայտնել, որ «Հայաստանին պետք է ոչ թե մասնավոր, այլ պետական ավիաընկերություն, կամ էլ մեկ ընդհանուր՝ Վրաստանի և Ադրբեջանի հետ համատեղ»:
