երեքշաբթի, 13 օգոստոսի 2013
«Ընտրությունս ընտրությանդ վնաս չէ…»
Արի ու տես՝ աշուղ Ջիվանու հանգույն արված ձևակերպումը չեն ընկալում ոչ Եվրամիության, ոչ էլ Եվրասիական միության գաղափարախոսները: Տեսնենք, թե ինչպես կընդունվի ՀՀ փոխարտգործնախարարի երեկվա պարզաբանումը՝ «ՀՀ»: Թեման արծարծում են «Ժողովուրդը» («Ռուսաստանին դուր չի գալիս Եվրոպայի հետ մերձեցումը», «Հակասական»), «Առավոտը» («Հայերի նկատմամբ ՌԴ-ում ճնշումները նոր որակ են ստանում»), «Ժամանակը» («Ռուսաստանից արտաքսում են նաև Սամվել Կարապետյանի օբյեկտներում աշխատող հայերին»):
Անսալով «ոմանց» խորհրդին, վարչապետն արձակուրդից առաջ «ակտիվորեն շրջել է Հայաստանով մեկ, ներկայացել հասարակությանը, ցույց տվել, որ աշխատում է» (ձևակերպումները «Հրապարակինն» են): Ավելին, «Ժամանակի» ունեցած տեղեկությամբ երկրի պաշտոնյաները նույնպես, փոխվարչապետից սկսած, պետք է մարզեր այցելեն, ծանոթանան «հատկապես գյուղաբնակների խնդիրներին և համակարգեն դրանք»:
«Ժողովուրդը» խորամուխ է եղել այն խնդրին, թե ինչպես են գոյանում «իշխանություններին կից զանազան բարեգործական հիմնադրամների» միջոցները:
Սակավաթիվ թերթերի մյուս թեման մարդկանց բողոքի ելույթներն են, այդ թվում՝ կառավարության շենքի առջև («Առավոտ»):
Նարեկ Սարգսյանի նոր պաշտոն ստանձնելը «Հրապարակն» համարում է Կառավարության շենքի թմբուկի կառուցման նշան՝ «Ասել է՝ պետք է կառուցի»: Նույն թերթը նաև տեղյակ է, որ կառավարության աշխատակազմի «Տնտեսական բարեփոխումների վերլուծական-տեղեկատվական կենտրոն» ՊՈԱԿ-ի տնօրենի թափուր պաշտոնը վարչապետի առաջարկով զբաղեցնելու է Աղասի Ենոքյանը:
