չորեքշաբթի, 21 օգոստոսի 2013
«Բաց նյարդ» ունեցողների երկխոսությունը
Կրթության և գիտության նախարարը հանդիպել է քաղաքացիական նախաձեռնության անդամ ուսանողներին և «որպես քաղաքական-հասարակական գործիչ և որպես նախարար» դրվատել երիտասարդներին, «ովքեր ունեն ցանկություն, բաց նյարդ, որը ցավում է հանրային հետաքրքրություն ներկայացնող խնդիրների և հատկապես կրթության ոլորտի բարելավման համար»։ Ինչպես սովորաբար լինում է, լրատվամիջոցները տարբեր տպավորությամբ են լքել հանդիպման վայրը. «Կավելացվեն պետպատվերի տեղերը» («ՀՀ»), «Ապացուցեք, որ չեք խնայում ինձ. ԿԳ նախարարը նման կոչ արեց լրագրողներին» («Առավոտ»), «Աշոտյանը խուսափում է պատասխանել, թե ինչո՞ւ Մանկավարժականը չի բարձրացնում ուսման վարձը» («Ազգ»), «Սեպտեմբերի 2-ը կնշանավորեն դասադուլով» («Ժողովուրդ»)։
ՀՀ փոխվարչապետի ներկայությամբ Գեղարքունիքի մարզի երկու գյուղերում ամբուլատորիաներ են բացվել («ՀՀ»)։ Նույնիսկ «Հրապարակը» սխալ է համարում ասել, թե մեզանում հիվանդանոցաշինության գործում բարձիթողի վիճակ է. միայն Արմավիրում վերջերս երեք բուժամբուլատորիա է շահագործման հանձնվել։ Բայց ահա Էջմիածնի հիվանդանոցը, ըստ այս թերթի, ուշադրությունից դուրս է մնացել։
Փողը թանկացնելու՝ Կենտրոնական բանկի որոշումը «Հայոց աշխարհի» զարմանքն է հարուցել. «Կենտրոնական բանկը պայքարում է գնաճի՞, թե՞ տնտեսության դեմ»։
Բնապահպանության նախարարության երիտասարդ աշխատակցի ողբերգական մահը տարօրինակ արձագանք է տվել «Ժողովուրդի» առաջին իսկ Էջում, «Ինքնասպանություն կառավարությունում» խորագրի ներքո։ «Ինքնասպանությունների «շքերթը» հասել է նաև ՀՀ պետական կառույցներ», և արդեն այդ քայլին են դիմում չինովնիկները», գուժում է թերթը՝ միաժամանակ հավելելով, որ վարկածներից մեկի համաձայն երիտասարդն այդ քայլին է դիմել «ինչ-որ աղջկա պատճառով, ավելին, դեպքից առաջ հեռախոսով զրուցել է մի աղջկա հետ»։
