ուրբաթ, 23 օգոստոսի 2013
Ամեն միտքը մի ասույթ է
Խոսքը վերաբերում է ԱԺ պատգամավոր Հրանտ Բագրատյանի «Սա արդեն արտագաղթ չէ, սա էվակուացիա է» ֆեյսբուքյան ձևակերպմանը, որը չեն հոգնում մեջբերել տարատեսակ լրատվամիջոցները, այս անգամ՝ «Հրապարակը»։ Պատգամավորի թևավոր խոսքը հավուր պատշաճի տեղ է զբաղեցրել «Իրավունքի» «Ընկ. Փանջունու անկյունում»։ Բագրատյանի դիտարկմամբ տարվա առաջին վեց ամսում «կյանքը վատացել է 1.5 տոկոսով»։ Դրությունն այնքան էլ անհուսալի չէ «Ազգի» մեկնաբանությամբ. «…հուլիսին տնտեսական ակտիվությունը Հայաստանում շարունակել է աճել, բայց ոչ մեծ տեմպերով, իսկ 7 ամսվա կտրվածքով աճի տեմպը նվազել է»։
Կառավարության երեկվա նիստում հնչած այն հավաստիացումը, թե իրագործվելու է նաև դիզվառելիքի ձեռքբերման պետական աջակցության ծրագիրը, «Ժողովուրդին» հիշեցրել է այդ ասպարեզում արձանագրվող չարաշահումները, երբ «պետբյուջեի միջոցներն ուղղվում են մտերիմի ու քաղաքական հովանավորի հարստացմանը»։ Թերթը նաև տրտնջում է, որ ՀՀԿ ԳՄ երեկվա նիստի վերաբերյալ լրագրողներին բավարար տեղեկություն չի տրվել։
Ուսման վարձի ավելացումը շարունակում է մնալ ԶԼՄ-ներին հետաքրքրող թեման, որին անդրադարձել են «ՀՀ»-ն, «Իրավունքը» և «Հրապարակը»։
