Հայաստանի Հանրապետության Կառավարություն

 Պատկերացնո՞ւմ եք, այս թերթի «թղթակցին բախտ է վիճակվել հանդիպել այնպիսի մի անձնավորության, ով վերջերս զրուցել է» ՀՀ նախագահի և ՀՀ վարչապետի հետ։ Եվ ահա ընթերցողին են փոխանցվում «իշխանության բուրգի ամենավերևում կանգնածների իրական տրամադրությունները»՝ «Մխիթարանքը դարձել է իշխելու մեթոդ»։
Նույն «Ժողովուրդը» կանխատեսում է, որ այս տարի մեր հայրենակիցներն, իբր, իրենց հարազատներին արտերկրից կփոխանցեն 2.5 մլրդ դոլար՝ «մոտավորապես ՀՀ պետական բյուջեի չափ գումար»։ Ահա թե ինչի հաշվին ենք մենք գոյատևում։ Գնաճն էլ, որը վերջին ժամանակներս զգալի է, «կհասնի 8.5 տոկոսի, որից հետո կսկսի նվազել» («ՀԱ»)։
Մամուլը («ՀՀ», «Ազգ») խոստումնալից է համարում հայ-բելառուսական համագործակցությունը, որին նվիրված միջկառավարական 10-րդ նիստն է տեղի ունեցել երեկ։
«Ժամանակը» կառավարության կայքից տեղեկացել է, թե «պետական գերատեսչություններն» ինչքան են ծախսում հեռախոսային խոսակցությունների վրա, և կառավարությանը հորդորում է նոր տեխնոլոգիաների կիրառմամբ անհամեմատ ավելի էժան, «գրեթե անվճար» հեռախոսակապ ունենալ։
Նույն թերթը տխուր հետևության է հանգում արևմտյան և հայկական վերնախավերը համեմատելիս. «…որքան աղետալի է արժեհամակարգային այն բովանդակությունը, որ ընկած է հայաստանյան արդի միջավայրի հիմքում»։
«Հրապարակի» տեղեկացմամբ ՀՀ վարչապետի գլխավորած պատվիրակությունը սեպտեմբերի 2-ին մասնակցելու է ԼՂՀ անկախության օրվա տոնակատարությանը, իսկ ՀՀ նախագահը սեպտեմբերի 17-ին՝ Մոսկվայի նորակառույց հայկական եկեղեցու օրհնության արարողությանը։