շաբաթ, 31 օգոստոսի 2013
Հրաժարականի սպասելիս
Վիճծառայության երեկվա տվյալները թերթերի մի մասին թույլ են տվել մատնանշելու Հայաստանի տնտեսության «անկումային վիճակը», երբ «օտարերկրյա ներդրումները խայտառակ կերպով նվազել են» («168 ժամ»), «թանկացման ալիքը մեղմացել է, բայց գնաճը շարունակում է խորանալ» («ՀԱ»), «հուլիսին անշարժ գույքի գները դարձյալ անփոփոխ են» («Ազգ»)։ «ՀԺ»-ն էլ, նկատի առնելով այն հանգամանքը, որ «արդեն հինգ ամիս է, ինչ գնաճը գերազանցում է աշխատավարձի աճը», ըմբոշխնում է առաջիկա «հրաժարականների շքերթը»։ Թերթին չի սթափեցնոմ նույնիսկ սոցապ նախարարի հիշեցումը, թե «ճտերը աշնանն են հաշվում»։
«Ժամանակը» մտահոգված է, որ 90-ականների սկզբին երկրում ծայր առած բարեփոխումը «արգելակվել է», իսկ երկրորդ սերնդի բարեփոխումը կսկսվի այն ժամանակ, երբ «հասարակությունը իր գիտակցությամբ, իր մտածողությամբ պահանջի այդպիսի բարեփոխում»։ Մյուս կողմից, երկիրն այժմ «դաժան երկընտրանքի» առջև է կանգնած՝ ԵՄ հետ ասոցացման պայմանագի՞ր, թե՞ ՌԴ-ի նախաձեռնած մաքսային միություն («ՀԺ»)։
«Հրապարակը» ամեն կերպ ձգտում է թերագնահատել «Կայուն դպրոցական սնունդ» ծրագրի նշանակությունը՝ այն հանգեցնելով մանուկներին կաթ ու բուլկի տալու վաղուց մոռացված նախաձեռնությանը։
«Գոլոս Արմենիի» կարծիքով, չնայած «գենդերի» օրենքի փոփոխության առաջարկությանը, այն «վերից վար գենդերային է մնում և պետք է փոխել ամբողջովին, այլ ոչ թե տեղ-տեղ»։
