շաբաթ, 7 սեպտեմբերի 2013
Փոխլրացնող տվյալներ
«Հայաստանում թանկացումն ահռելի չափեր է ընդունում» («Ժողովուրդ»), բայց և «մրցունակությունը բարելավվում է» («ՀԱ»): Երկրում արձանագրված 9.3 տոկոս գնաճի 9.2 տոկոսը, ըստ «Ազգի», «պարենամթերքներում» է: Գյուղատնտեսական մարմինները, այդ թվում նախարարությունը, «չեն կատարում երկրի հանդեպ իրենց հիմնական պարտավորությունը՝ բնակչության ապահովումը միս-մսամթերքով, կաթ-կաթնամթերքով, կենդանական և բուսական յուղով»: Դրա փոխարեն «նախապատվությունը տրվում է բանջարաբոստանային ու այգեգործական համեմատաբար ռիսկային բաց դաշտավարությանը», այժմ էլ ավելանում է «ոչխարաբուծության հանդեպ նախարարության հետաքրքրությունը», ինչը «հիշեցնում է Ախուրյանում տարեկան 230 հազար տոննա հզորությամբ շաքարի գործարանի ճակատագիրը, երբ հումքը բացակայում է»:
«Ժամանակը» փորձել է պարզել, թե «ուր են հոսում կառավարության պահուստային ֆոնդի գումարները», բայց վկայակոչված թվական տվյալներն առնվազն տարակուսանք են հարուցում:
«Ժողովուրդը» քննադատաբար է անդրադարձել համայնքների խոշորացման գործընթացին, որը մեկնարկելու է առաջիկայում:
«Հրապարակը» տեղեկացնում է, որ «Նաիրիտի» աշխատողները «ոգևորությամբ են ընդունել մաքսային միությանն անդամակցելու լուրը» և հույսով սպասում են, թե ինչով է ավարտվելու «Ռոսնեֆտի» հետ բանակցությունը: Մաքսային միությանն անդամակցելու թեման հրատապ է մնում «168 ժամի», «Ժողովուրդի», «Ժամանակի», «ՀԺ»-ի մի շարք նյութերում:
