ուրբաթ, 13 սեպտեմբերի 2013
Փոխլրացնող գնահատականներ
«Հայոց աշխարհը» գրել է, որ «չնայած Հայաստանը դեռևս պաշտոնապես չի դարձել Մաքսային միության անդամ, այդուհանդերձ «հայ-ռուսական տնտեսական հարաբերություններում ակտիվություն է նկատվում»: «Ժողովուրդին», «Հայկական ժամանակին», «Ժամանակին» առավելապես հետաքրքրել են ՄՄ անդամակցության վերաբերյալ ԱԺ նախագահ Հովիկ Աբրահամյանի գնահատականները, «Իրավունքին»՝ տնտեսագետ Աշոտ Թավադյանի հայտարարությունը՝ «Մաքսային միությունը առաջնահերթ լուծում է ներդրումային, զբաղվածության խնդիրներ», «Առավոտին»՝ Հայրենական ապրանք արտադրողների միության նախագահ Վազգեն Սաֆարյանի «համոզմունքը», ըստ որի «Մաքսային միություն մտնելը Հայաստանում մենաշնորհը կկազմալուծի»: Թեման արծարծել է նաև «Իրատես դե ֆակտոն»՝ «Ինչ են որոնում մեր օրերի արքիմեդները»:
«Ազգը» վերջին տարիներին առկա գործազրկության հիմնահարցին անդրադարձում նշել է, որ թեև անցյալ տարի գրանցվել է ամենացածր ցուցանիշը (16,4 տոկոս), այդուհանդերձ նոր աշխատատեղերի ստեղծման նպաստավոր պայմանների ապահովումը շարունակելու է մնալ «կառավարության առաջնահերթություններից մեկը», «Ժամանակը» արձագանքել է «փակ շուկայի» խնդրի առիթով ճարտարապետների միության նախագահ Մկրտիչ Մինասյանի հայտարարությանը («Ոչ թե Սամվել Ալեքսանյանից, այլ կառավարությունից են պահանջում»):
