շաբաթ, 14 սեպտեմբերի 2013
«Արցունքները հոսում էին…»
Մամուլը լրջորեն տպավորված է գլխավոր դատախազի հրաժեշտի արարողությամբ. «Աղվան Հովսեփյանը հրաժեշտ տվեց» («ՀՀ»), «Աղվան Հովսեփյանը գնաց արցունքով» («Հրապարակ»), «Պաշտոնից հեռանալով, Աղվան Հովսեփյանն համբուրեց գլխավոր դատախազության դուռը» («Նովոյե վրեմյա»), «Սրտառուչ շոկ» («Ժամանակ»), «Բրազիլական սերիալի սցենարով» («ՀԺ»): Չբավարարվելով այսքանով, վերջին երկու թերթերը գլխավոր դատախազի գործունեության որոշ մանրամասներ են ճշտում ԱԺ պատգամավոր Դավիթ Հարությունյանից, իսկ «Ժողովուրդը»՝ հուզմունքը հազիվ զսպող գլխավոր դատախազի տեղակալ Արմեն Դանիելյանից:
«ՀՀ»-ն լուսաբանել է վարչապետի այցը Հայաստանի տնտեսության ձեռքբերումների ցուցահանդես և ՏՏ ոլորտի նոր ընկերության հետ փոխըմբռնման հուշագրի ստորագրման արարողությունը, «Նովոյե վրեմյան»՝ հայկական կոնյակի հնարավոր ամրապնդումը չինական շուկայում, «Գոլոս Արմենիին», ընդունելով, որ Մաքսային միությանն անդամակցելու դեպքում Հայաստանը կարճաժամկետ դրական արդյունք կստանա, երկարաժամկետ հեռանկարում «հետ գլորվելու» կանխատեսում է անում, «ՀԺ»-ն հիշեցնում է, որ երկրի իշխանությունը նախորդ 5 տարում չի կատարել ատոմակայանի և Իրան-Հայաստան երկաթուղու շինարարությունն սկսելու կառավարության ծրագիրը, իսկ «Ժողովուրդը» «մեր երկրի այսօրվա թշվառ վիճակի» պատճառների թվում շեշտում է մտավորականության, մասնավորապես՝ ստեղծագործական միությունների ղեկավարության բացասական դերը:
«Ազգն» արձանագրում է, որ մեզանում այսօր շատ է տարածված «սեփական երկրին սև ակնոցով նայելու» երևույթը, որը «կարող է շատ ավելի վտանգավոր լինել, քան ակնկալվում է»: Հոդվածագիրը թվարկում է կառավարության նպատակները, որոնցից յուրաքանչյուրի իրագործումը «մեծ նվաճում է»: Եզրակացությունն այն է, որ «Հայաստանի բնակիչներն այս ամենը պարզապես չգիտեն»: Դրա առաջին պատասխանատուն, ըստ թերթի, կառավարությունն է, երկրորդը՝ լրատվամիջոցները, որոնք «պարզապես չունեն այնպիսի կադրեր, որոնք ի վիճակի են վերլուծել առկա տվյալները»:
