հինգշաբթի, 19 սեպտեմբերի 2013
Տարբեր բևեռների կամուրջը
Թեև «Հայկական ժամանակը» փոխանցել է, որ կառավարության այսօրվա նիստում ներկայացվելու են Մաքսային միությանը Հայաստանի անդամակցությունը ապահովելու նպատակով նախատեսվող աշխատանքները, այդուհանդերձ «Ժամանակում» ԵՊՀ եվրոպական ուսումնասիրությունների կենտրոնի ղեկավար Արթուր Ղազինյանը հայտարարել է, որ «Հայաստանը չի մտնի Մաքսային միություն»: Թեմային անդրադարձել են նաև «Հրապարակը», «Ժողովուրդը», «Առավոտը» և «168 ժամը», որը ներկայացրել է ԱԺ պատգամավոր Հրանտ Բագրատյանի («Ռուսաստանին դուր չի գալիս «Հայկական դավաճանությունը», Եվրոպային՝ նույնպես»), նախկին խորհրդարանական Ռաֆիկ Պետրոսյանի («Եթե չմիանայինք Մաքսային միությանը, բա ո՞ւմ միանայինք») տեսակետները և Արդյունաբերողների և գործարարների միության նախագահ Արսեն Ղազարյանի դիտարկումները՝ «Հայաստանը կարող է կամուրջ լինել Եվրամիության և Մաքսային միության շուկաների միջև»:
«Ժամանակը» անդրադարձել է ՀՀ նախագահի և կառավարության աշխատակազմերի կողմից բյուջետային գումարների ծախսման վերաբերյալ տեղեկատվությանը, «168 ժամը» «պնդել», թե իբր «բիզնես միջավայրի բարելավմանը կոչված հարկային բարեփոխումները… ավելի են բարդացնում գործարարների կյանքը», «Հայոց աշխարհը» հայտարարել, որ «արտագաղթի պատճառները բազմազան են», սակայն «դրանց հիմքերը հիմնականում պետք է փնտրել տնտեսության մեջ»:
«Հայկական ժամանակը» արձագանքել է կառավարության պահուստային ֆոնդից Երևանի քաղաքապետարանին 9 միլիարդ դրամ հատկացնելուն («Փշալար քաշեք, պրծեք»): «Ժողովուրդը» գրել է, թե «գազի և էլեկտրաէներգիայի սակագների բարձրացման պատճառով» «Հայաստանում ջերմոցները շարունակում են փակվել», մի այլ հրապարակման մեջ էլ հավելել, թե «Արդֆուդ» գործարանը «դեղձը մթերել է 50 դրամով»:
