երեքշաբթի, 24 սեպտեմբերի 2013
Moody’s-ի «անմիջական» որոշումը
«Հայկական ժամանակի» մեկնաբանությամբ «Moody’s» վարկանիշային գործակալության կողմից ՀՀ արժութային պարտատոմսերի վարկանիշի ներդրումային դասից իջեցման որոշումը «անմիջապես հաջորդել է… կառավարության կողմից 700 մլն դոլարի եվրոբոնդեր վաճառելու գործարքին»: «Ժամանակը» արձագանքել է ՀԲ-ի և ԱՄՀ-ի տարեկան գագաթաժողովին մասնակցելու նպատակով ՀՀ վարչապետ Տիգրան Սարգսյանի Վաշինգտոն նախատեսվող այցին, մի այլ հրապարակման մեջ «չմոռանալով» «քննության առնել» նախկին վարչապետ Արմեն Սարգսյանի՝ վերստին «Անգլիայում ՀՀ դեսպան «նշանակվելու» հնարավորությունը» («Ինչ ակնկալիքներով է աշխուժանում Արմեն Սարգսյանը»): «Հրապարակը» «զգուշացրել» է՝ «Վազգեն Մանուկյանը ակտիվանում է», նաև փոխանցել «որոշ շրջանակների» կարծիքը, թե «Մաքսային միությանն անդամակցելու հարցում» նախկին վարչապետը «վճռորոշ դերակատարում է ունեցել»:
«Հայոց աշխարհը» մտահոգություն է հայտնել, թե «Ադրբեջանից և Թուրքիայից սննդամթերքի ներկրման առջև կանաչ լույս է վառված», և «փաստը օրերս խոստովանել է նաև Գյուղատնտեսության նախարարը»: Թեմային անդրադարձել է նաև «Ազգը»՝ «Հիմա էլ ադրբեջանական և թուրքական գյուղատնտեսությունն ենք զարգացնո՞ւմ. կփոխվի՞ Հայաստանի կառավարության անհեռատես մոտեցումը»:
«168 ժամը» ծավալուն հրապարակումներից մեկում ներկայացրել է 2012թ. ՀՀ-ից արտահանված առավել բարձր մաքսային արժեք ունեցող ապրանքների ցանկը («Ինտեգրումը՝ արտահանմամբ»), մյուսում՝ թե «Ինչպես է ծախսվել ռուսական 500 մլն դոլար վարկը»: «Իրավունքը» հայտարարել է, թե «Տնտեսությունում բացասական դինամիկան խորանում է». «Հայկական ժամանակը» արտագաղթի պատճառների ուսումնասիրման արդյունքների վերաբերյալ զրուցել է Միգրացիայի պետական ծառայության տնօրեն Գագիկ Եգանյանի հետ, «Իրատես դե ֆակտոն»՝ վերստին արծարծել «Մաքսային միությանը անդամակցության շուրջ» դիտարկումներ («Հոգենյութի 28 գրամը»):
