չորեքշաբթի, 25 սեպտեմբերի 2013
«Կապրենք՝ կտեսնենք»
«Ժողովուրդի» տեղեկությամբ ՀՀ նախագահ Սերժ Սարգսյանի հանձնարարությամբ «շտապ ձևավորված… բանիմաց տնտեսագետներից և գործարարներից բաղկացած խումբն» այսօր մեկնելու է ՌԴ մայրաքաղաք՝ քննարկելու «ՀՀ-ի հետ միասնական մաքսային գոտու գործարկման մեխանիզմները», «Հայկական ժամանակի» փոխանցմամբ՝ վարչապետ Տիգրան Սարգսյանի ղեկավարությամբ ՄՄ-ն անդամակցելու նպատակով ստեղծվել է կոորդինացիոն հանձնաժողով, Հայաստանում Միացյալ թագավորության արտակարգ և լիազոր դեսպանն էլ թերթի հետ զրույցում որոշել է «անկեղծ լինել» և հայտարարել է, թե չնայած «ինտենսիվ քննարկումներ են ընթանում ՀՀ-ԵՄ համագործակցության հետագա օրակարգի շուրջ, այդուհանդերձ «այս պահին ոչ ոք չի պատկերացնում և հասկանում, թե որոնք են լինելու հաջորդ քայլերը»: Թեմային արձագանքել են նաև «Ժամանակը» և «Ազգը», որը ՄՄ-ը միանալու խնդրականներին իր անդրադարձը «վերջակետել» է «հուսառատ սպասումի» խոսքով՝ «Կապրենք՝ կտեսնենք»:
«Հայաստանի Հանրապետության» հրապարակումներից մեկը ներկայացրել է ադամանդագործության զարգացման ուղղությամբ ձեռնարկվող քայլերը (Ադամանդագործություն. Հայաստանն ի վիճակի է մրցել ամենաբարձրորակ հատվածում), մյուսը՝ տեղեկացրել, որ «ներմուծվել է տրակտորների նոր խմբաքանակ՝ ի շահ գյուղատնտեսական աշխատանքների արդյունավետության»:
«Ժամանակը» եվրապարտատոմսերի թողարկմանն անդրադարձել է «Տեղաբաշխումը հաջող էր, հետևանքը՝ վտանգավոր» հոդվածում: Թեման արծարծել է նաև «Հայոց աշխարհը» («Եվրաբոնդերի առավելություններն ու թերությունները»):
