ուրբաթ, 27 սեպտեմբերի 2013
Կարմիր գծից անդին
ԵՄ Հայաստանի պատվիրակության ղեկավարի պնդմամբ իրենք միշտ էլ ուզեցել են պարզել, թե որն է այն կարմիր գիծը, մինչև որտեղ Հայաստանը պատրաստ է շարունակել հարաբերությունները Եվրամիության հետ՝ առանց վնասելու ՌԴ-ի հետ հարաբերություններին («Ժողովուրդ»): Այս թեմայով դատողություններ են անում Վահագն Խաչատրյանը և Բագրատ Ասատրյանը («Հայացք»), իսկ Խոսրով Հարությունյանը «Առավոտում» կարծիք է հայտնում, որ «գերտերությունները պետք է վերանայեն տարածաշրջանում իրենց մարտավարությունը»:
Կառավարության երեկվա նիստի օրակարգի հարցերից ամենամեծ արձագանքն ստացել է շինարարության ոլորտի խթանման ծրագիրը՝ «Պետությունը կերաշխավորի հիփոթեքային վարկի 30 տոկոս կանխավճարը» («Ազգ»), «Հանուն ցուցանիշի» («ՀԺ»), «Պետական ծառայողի ողորմելի աշխատավարձն ու «գայթակղիչ» վարկը» («Հրապարակ»):
Հայաստանի կողմից «թափանցիկ կառավարություն» նախաձեռնությանը միանալը ոչ այլ ինչ է, եթե ոչ սեփական խնդիրները կամովին «օտարերկրյա լրտեսների ու մասնագետների խիստ նեղ շրջանակին» հանձնելը («Իրատես դե ֆակտո»):
Կառավարության վաղվա արտահերթ նիստին, որի ընթացքում քննարկվելու է 2014թ. ՀՀ պետական բյուջեի նախագիծը, «Իրավունքը» անդրադարձել է «հարց-բացատրականով»՝ «Ինչով է բացատրվում Բյուջե 2014-ի մոտ 120 մլրդ դրամ եկամտային աճը»: «Հայկական ժամանակը» «ուշագրավ» է համարել, որ «բյուջեի նախագծի հետ հարկային օրենսդրությունում փոփոխություններ կատարելու փաթեթ ՊԵԿ-ը չի ներկայացնելու» և դա պայմանավորել ՄՄ կազմ ընդգրկվելու որոշմամբ: Թեմային իր արձագանքում «Հայացքը» նախ «հայտարարել» է, թե իբր գալիք տարվա պետբյուջեի զգալի ավելացման «իշխանությունների պլանավորումը… խիստ վախեցրել է խոշոր օլիգարխներին», ապա, մի այլ հրապարակման մեջ, թերևս նրանց «մխիթարելու առաքելությամբ», «ակնհայտ» համարել, թե «բյուջետային մուտքերը… փորձելու են ապահովել փոքր և միջին բիզնեսի հաշվին»:
«Դելովոյ էքսպրեսը» փոխանցել է տնտեսության հիմնախնդիրների և առաջնահերթությունների վերաբերյալ տնտեսագետ Թաթուլ Մանասերյանի և «Տնտեսություն և արժեքներ» ՓԲԸ ղեկավար Մանուկ Հերգնյանի տեսակետները:
