շաբաթ, 28 սեպտեմբերի 2013
Բուրգերի երկիր Հայաստանս…
«Ժողովուրդը» շարունակում է հրապարակել «Վիկիլիքսի» «հանրաձայնած հետաքրքիր փաստաթղթերը»: Հերթը հասել է Հայաստանի «տնտեսական ոլորտում գործող խմբավորումներին», որոնք թվարկված են ԱՄՆ նախկին դեսպաններից մեկի հաղորդման մեջ: Իսկ ահա իր կողմից թերթը նկատում է, որ «վիրտուալ դաշտում», իբր, միմյանց դեմ են դուրս եկել կառավարությունը և Ազգային Ժողովը՝ համապատասխանաբար շահելով լրագրողական «Ոսկե բանալի» և «Ժանգոտ կողպեք» մրցանակները: «Խմբագրի սյունակը» իր հերթին «տրամագծորեն տարբեր» է գտնում երկրի ղեկավարների մի շարք հայտարարությունները:
«168 ժամը» խորհրդարանում «Նաիրիտի» գործունեությունն ուսումնասիրող հանձնաժողով ստեղծելու՝ ՀՅԴ-ի առաջարկությունը համարում է այս կուսակցության ղեկավարների և վարչապետի «լարված» հարաբերությունների վկայություն: Թերթը նաև PFA կենտրոնի օգնությամբ նպատակահարմար չի գտնում եվրապարտատոմսերի թողարկումը, ինչպես նաև գիտաշխատող Հարություն Կարապետյանի բերանով քննադատում է կառավարության քաղաքականությունը գիտության բնագավառում:
«ՀԱ»-ն պատասխանում է, թե ի՞նչ կտա շինարարությունը խթանելու կառավարության «հերթական փորձը», «Առավոտը» ավարտին է հասցնում Խոսրով Հարությունյանի խոհերի տպագրությունը՝ «Գերտերությունները պետք է վերանայեն տարածաշրջանում իրենց մարտավարությունը», «Նովոյե վրեմյան»՝ հատվածներ տպագրում մեկ այլ նախկին վարչապետի՝ Արմեն Դարբինյանի լույս ընծայած գրքից:
