հինգշաբթի, 3 հոկտեմբերի 2013
Նախկին նախարարի «դեղին քարտը»
«Հայաստանի Հանրապետությունը» երեկվա ԱԺ-կառավարություն հարցուպատասխանի իր անդրադարձը խորագրել է «Հայաստանից ՄՄ երկրներ արտահանումը կհեշտանա. այդ նպատակով մշակվել են հատուկ մեխանիզմներ»: Հարցուպատասխանի մանրամասները տարբեր մեկնաբանություններով ներկայացրել են նաև «Հրապարակը», «Ժամանակը», «168 ժամը», «ՀԺ»-ն, «Առավոտը», «Ազգը» և «Ժողովուրդը»:
«168 ժամ»-ի հետ զրույցում ֆինանսների և էկոնոմիկայի նախկին նախարար Էդվարդ Սանդոյանը ներկայացրել է տնտեսական գործընթացների մասին իր տեսակետները՝ «Մաքսային միությանն անդամակցության առաջին տարվա ընթացքում մենք կարող ենք մոտ 300 մլն դոլարի կորուստ ունենալ»: Մի այլ հրապարակման մեջ թերթն անդրադարձել է կենսաթոշակային նոր՝ կուտակային համակարգին, որ սկսելու է գործել 2014 թվականից, նշելով, թե տակավին «հայտնի չեն կենսաթոշակային հիմնադրամների կառավարիչները, հայտնի չէ, թե քաղաքացիները երբ են հասցնելու ծանոթանալ դրանց» ու եզրակացնելով, թե «կույր ընտրություն» են անելու:
«Ժողովուրդի» հետ զրույցում «ՀԱԿ»-ի վարչության անդամ Վահագն Խաչատրյանը հայտարարել է, թե «Հայաստանի տնտեսության մեջ իրականում աճ չկա»: «Հայոց աշխարհին» հետաքրքրել է պետական ապարատի պահպանման նպատակով գալիք տարվա պետբյուջեում նախատեսված գումարի չափը («Պետական ապարատի պահպանումը թանկ հաճույք է»), «ՀԺ»-ին՝ երեկվա ասուլիսում «Էկոլուր» կազմակերպության «փոքր ՀԷԿ-երը միջազգային ֆինանսական ինստիտուտների հովանու ներքո» ուսումնասիրության արդյունքները («Մեծ շահեր՝ փոքր ՀԷԿ-երում»), «Հրապարակին»՝ անկախության տոնին Նունե Եսայանի մենահամերգի համար ծախսված գումարի վերաբերյալ ԱԺ պատգամավոր Ռուզաննա Մուրադյանի տեսակետը («Նունե Եսայանի համերգը, հնարավոր է՝ բազում հիվանդների է բժշկել»):
«Հայկական ժամանակի» փոխանցմամբ կառավարությունն այսօր քննարկելու է «Գեո-Պրո-Մայնինգ» ընկերության հարկային պարտավորությունների վճարման ժամկետի երկարաձգման հարցը՝ «Արտոնություն ոսկե սարերի տիրակալին»:
