Հայաստանի Հանրապետության Կառավարություն

Մաքսային միության թեմայի այսօրվա արծարծումը նախաձեռնել է վարչապետ Սարգսյանը՝ պատասխանելով «Իրավունքի» հարցերին. «Մաքսային միությանը միանալն ամենևին չի նշանակում Եվրոպական միության հետ քաղաքական երկխոսությունից հրաժարում»: «Դելովոյ էքսպրեսը» խնդիրը շոշափել է երկու՝ «Հայաստանի համար Մաքսային միության բերելիք դրականն ու բացասականը» և «Հայաստանից սկիզբ առնող ավտոփոխադրման առյուծի բաժինը Ռուսաստանով է անցնում» հոդվածներով: Թեմայի հանդեպ անտարբեր չէ Հրանտ Բագրատյանը: Նա նախ «Իրատես դե ֆակտոյի» ընթերցողին զգուշացրել է՝ «Թող ոչ ոք չկարծի, թե ավելի հեշտ է լինել ռուսական շուկայում», ապա և անկեղծացել՝ «Առանց որևէ միության մենք ավելի լավ կարող էինք զարգանալ»: Պակաս ինքնատիպ չէ ռուս վերլուծաբան Կոնստանտին Սիմոնովի կարծիքը. «Հայաստանի անդամակցությունը ՄՄ-ին վիրտուալ բնույթ է կրելու այն իմաստով, որ չկա ընդհանուր սահման, ուստի ես չեմ կարծում, որ անդամակցությունը կհանգեցնի առևտրաշրջանառության մեծ աճի» («Ժամանակ»):
Բազմաթիվ են եվրապարտատոմսերի իրացման արդյունքի և ֆինանսների նախարարի մամուլի ասուլիսի արձագանքները. «Հայաստանը դուրս է եկել աղքատ երկրների խմբից» («ՀՀ»), «Գազի փող՝ պարտք փակելու դիմաց» («ՀԺ»), «Ուշացած պարզաբանումներ ՀՀ վարչապետից» («Հրապարակ»), «Ասում են աղքատ չեք, որ փող չտան» («Ժողովուրդ»), «Ռուսական վարկն ամբողջությամբ կմարվի եվրապարտատոմսերից ստացած գումարով» («Ազգ»):
«Ազգը» ներկայացրել է քաղծառայողների աշխատավարձերի չափերի վերաբերյալ կառավարության հաստատած համապատասխան սանդղակը, որը «դեռևս պետք է քննարկվի և ընդունվի» խորհրդարանում: Աշխատավարձի բարձրացման թեման արծարծել են «Հայկական ժամանակը» («Ինչ արժի Ս.Սարգսյանի խոսքը») և «Հայոց աշխարհը» («Կենտրոնական բանկը ախորժակից չի դժգոհում»), որը մի այլ հրապարակման մեջ փորձել է նաև պարզել, թե «Ինչու են բարձրանում ծխախոտի գները», սակայն ստիպված է սպասել ՏՄՊՊ հանձնաժողովի մոնիտորինգի ավարտին: «Իրավունքը» անդրադարձել է Հայաստանում գենետիկորեն փոփոխված սննդի օգտագործմանը («Իրական վտա՞նգ, թե քարոզչական հնարք») և գյուղապրանքների գնաճին, հընթացս «քար գլորելով» ՏՄՊՊ-ի «բոստանը» («Երբ հակամենաշնորհային հանձնաժողովը դառնում է պասիվ դիտորդ»):