չորեքշաբթի, 16 հոկտեմբերի 2013
Նամակագրության ժանրը նորաձև է
Ճանաչված հրապարակախոսի նամակի արձագանքը վկայում է, որ համապատասխան փիարի դեպքում ժանրը կարող է հույժ նորաձև դառնալ, մանավանդ, որ երկրի բնակչության մեծամասնությունը գերադասում է գրել (օրինակ` սոցցանցերում), քան գիրք կարդալ:
Ինչ վերաբերում է հայտնի նամակի ստեղծման մանրամասներին, ապա դրանց տիրապետում է «Ժողովուրդը». թերթը տեսել է, թե ինչպես նամակը գրելուց մի քանի օր առաջ, «անցած հինգշաբթի օրը` կառավարության նիստից անմիջապես հետո, հեղինակը մտել է կառավարության շենք»: Այս փաստը բավական է պնդելու համար, որ «նամակի հետևում իրականում կանգնած են ՀՀ իշխանությունները»: «Ժողովուրդն» այս անգամ կորցրել է իր ինքնատիպությունը, որովհետև դեռ անցած շաբաթ օրից սկսած նման կարծիք են հայտնել անթիվ-անհամար ԶԼՄ-ներ: Չի արդարացել նաև թերթի սպասումը` տեսնելու, թե ինչպես են մեր իրավապահները իրենց ցանցը գցում պետական միջոցների թալանով զբաղված «շնաձկներին», ինչի խոստման տարին վաղուց է լրացել:
«ՀՀ»-ն և «ՀԺ»-ն դրվագներ են ներկայացրել, թե երեկ ինչպես է նշվել ՀՀ ԳԱ ակադեմիայի հիմնադրման 70-րդ տարեդարձը: «Ազգը» անդրադարձել է Հայաստանի տնտեսական ցուցանիշների վերաբերյալ ՀԲ-ի կանխատեսումներին: «Ժողովուրդը» տնտեսական աճի նվազման պատճառների շուրջ զրուցել է Հանրային խորհրդի նախագահ Վազգեն Մանուկյանի հետ («Կառավարությունը կանխագուշակությա՞մբ է զբաղված»), մի այլ հրապարակման մեջ էլ հայտարարել, թե իբր «Կառավարությունը խոչընդոտում է դեղարտադրությունը»` հանձինս մի որոշման, որը դեղ արտադրող ընկերություններին առաջադրում է ունենալ «Ջի-Էմ-Փի» սերտիֆիկատ` «համապատասխանեցված Եվրամիությունում գործող պահանջներին»: «Ժամանակին» հետաքրքրել է, թե 2014 թ. հուլիսի 1-ից «որքան կբարձրանա սովորական պաշտոնյաների աշխատավարձը», «Իրավունքը» հավելել է, թե «ՀՀ ԿԲ-ում գալիք տարի կստանան 515 հազար դրամ միջին աշխատավարձ», «Հայոց աշխարհը»` մտահոգություն հայտնել, թե «Կենսաթոշակները շատ դանդաղ են բարձրանում»:
