Հայաստանի Հանրապետության Կառավարություն

Հայտնի անեկդոտ կա. երկրի ղեկավարի մահը զարմացնում է միամիտ քաղաքացուն՝ «նրա ի՞նչն էր պակաս, փոխնախարարի պես ապրում էր»: Պարզվում է՝ փոխնախարարի պես ապրելը չի բավարարում մեր պատգամավորներին. նրանք սովոր են նախարարի պես ապրել: Իսկ ընդհանրապես պաշտոնյաների աշխատավարձն ավելացնելու խորհրդարանական քննարկումն անգամ դուր չի եկել մեր լրատվամիջոցներին՝ «Օրենսդիրներն ու իրենց գրպանային հարցերը» («ՀԱ»), «Ինչ արժե մեզ կառավարելը» («168 ժամ»), «Պաշտոնյաները նորմալ աշխատավարձ կստանան, իսկ մե՞նք…» («Ազգ»), «Մարտնչող կոռուպցիա» («Ժամանակ»), «Պետական հատվածը մեծացնում է մրցունակությունը» («Գոլոս Արմենիի»):
Առանց բացառության բոլոր լրատվամիջոցներին դուր է եկել օդային փոխադրումների ոլորտն ազատականացնելու կառավարության որոշումը: Ահա վերնագրերը՝ «Հայաստանն ընտրեց բաց երկնքի քաղաքականությունը. 1-2 տարում արդյունքն արդեն նկատելի կլինի» («ՀՀ»), «Ավիափոխադրումների ազատականացումը էական դրական նշանակություն կունենա» («Ժամանակ»), «Ավիատոմսերը կէժանանան» («Առավոտ»), «10 տարի անց Հայաստանի երկինքը «բացվեց». ավիացիայի ոլորտն ամբողջությամբ ազատականացվեց» («Ազգ»):
Ինչպես միշտ, ստվար մամուլ են «հավաքել» ԱԺ-կառավարություն հարցուպատասխանը՝ «168 ժամ», «Ժամանակ», «Առավոտ» ինչպես նաև «Կոռուպցիան Հայաստանում» զեկույցը և կառավարության երեկվա նիստի մի քանի հարցեր: