ուրբաթ, 25 հոկտեմբերի 2013
Երջանկության մեխանիկան
Օրինակ՝ պատգամավոր Գուրգեն Արսենյանը «երջանիկ է, որ իշխանության մաս չի կազմում», վոլեյբոլի մասին էլ կարծիք հայտնել չի կարող, քանի որ «այլ սպորտ է սիրում» («Ժողովուրդ»), նույնիսկ Դիլիջանի միջազգային դպրոցին դեմ չէ, բայց համապատասխան օրենքի նախագծին դեմ է քվեարկել, որովհետև «Հայաստանի հաշվին արտոնություններին է դեմ» («Առավոտ»): Եվ քանի որ մինչև օրս Հայաստանում իրոք չի հայտնվել որևէ պաշտոնյա, ով կհամարձակվի «ինտոնացիան բարձրացնելով» խոսել վոլեյբոլի թեմայով, այդ առաքելությունը ստանձնում է «Իրատես դե ֆակտոն»՝ «մե´նք ենք բարձր ինտոնացիայով խոսողը, որ ասում ենք՝ - Չափներդ ճանաչե´ք: Որովհետև դուք կատարյալ եք՝ ա) որպես քաղաքական դիակ, բ) որպես սպորտային դիակ, գ) որպես տղամարդ դիակ»:
Մամուլի համար օրախնդիր թեմա են մնում երկրի եվրոպական վեկտորի արծարծումը վարչապետի այցի միջոցով («Ժողովուրդ», «ՀԺ», «ՀՀ»), պաշտոնյաների աշխատավարձն ավելացնելու խնդիրը («Ազգ», «Հայացք», «ՀԺ», «Ժողովուրդ»), նախարար Աշոտյանի և Պյոտր Շեդրովիցկու մտքերը «չափավոր լավատեսության շրջագծում» («Իրատես դե ֆակտո»):
«Հայոց աշխարհի» հետ զրույցում ՀՅԴ խորհրդարանական Աղվան Վարդանյանը ներկայացրել է «Զբաղվածության մասին» նոր օրենքի նախագծի վերաբերյալ իր տեսակետները: Մի այլ հրապարակման մեջ թերթն արձագանքել է օդային փոխադրումների շուկայի հիմնախնդիրներին՝ «Բաց երկնքի» քաղաքականությունն այլընտրանք չունի»:
«ՀԺ»-ն «որոշել» է, թե իբր նոյեմբերի 1-ից ներդրվող նոր տիպի ՀԴՄ-ները «կառավարությունը փաթաթել է տնտեսվարողների վզին», «Ժամանակը» «զարգացրել» է «գործազրկության համար 18 հազար դրամ նպաստի վերացման» «սեփական տեսակետը», ըստ որի անհրաժեշտ «ֆինանսական միջոցները հավաքվում են… ունեզուրկ հասարակությունից», «Հայացքը»՝ փոխանցել ԱԺ պատգամավոր Հրանտ Բագրատյանի «ֆեյսբուքյան գուշակությունը» թե՝ «…Այս կառավարությունը վերջ կտա Հայաստանին»: Նպաստի թեման արծարծել է նաև «Իրավունքը» Աշխատանքի և սոցիալական հարցերի նախարարի հետ զրույցում:
«Իրավունքը» անդրադարձել է այս տարվա հունվար-սեպտեմբեր ամիսների տնտեսական ակտիվության վիճակին՝ ըստ ԱՎԾ վերջերս հրապարակած տվյալների («Եվ ինչի վրա են ծախսում պետական միլիարդները»), «Դելովոյ էքսպրեսը»՝ գյուղմթերքի վաճառքի հիմնախնդիրներին, երբ մասնավորապես «գյուղացին ստանում 20 տոկոս եկամուտ, վերավաճառողը՝ 80 տոկոս»:
