հինգշաբթի, 28 նոյեմբերի 2013
ՀԲ-ի զեկույցը և նրա խորհուրդը
«ՀՀ»-ն ներկայացրել է ֆինանսական ռեսուրսների հասանելիության համապատասխան հայեցակարգում ներառված 12 տարբերակները, որոնց կիրառումը կնպաստի «իրական հատվածում պետական քաղաքականության առավել նպատակային» իրականացմանը: Ֆինանսների նախարարի հետ զրույցում «Ժամանակին» առավելապես հետաքրքրել է այն հարցը, թե «Հազարամյակի մարտահրավերներ կորպորացիան» երկրորդ անգամ կֆինանսավորի՞ Հայաստանին»: «Հայոց աշխարհը» փոխանցել է «Հայրենական ապրանք արտադրողների միության» նախագահ Վազգեն Սաֆարյանի, «Նովոյե վրեմյան»՝ տնտեսագետ Թաթուլ Մանասերյանի տեսակետները ՄՄ-ը Հայաստանի անդամակցության տնտեսական հեռանկարների վերաբերյալ, «168 ժամի» հետ զրույցում «ԱրմԹեք» կոնգրեսի համանախագահ Թոնի Մորոյանը՝ նշել միջազգային կառույցի կարևոր նպատակը՝ «համահայկական էլեկտրոնային ցանց ստեղծելը» և նպաստելը, որպեսզի «մարդկանց համար ընդունելի լինի Հայաստանում ներդրումներ կատարելը»:
«Հայոց աշխարհը» ՀԲ-ի «Հայաստանի Հանրապետություն. կուտակում, մրցակցություն, մրցակցելիություն» զեկույցին անդրադարձը խորագրել է «Հայաստանում մոնոպոլացման ու գործազրկության մասին»: Զեկույցը լուսաբանել են նաև «168 ժամը» («Հայաստանը՝ մոնոպոլիաների տարածաշրջանային կենտրոն»), «Առավոտը» («Համաշխարհային բանկը՝ կոռուպցիայի հովանավո՞ր»), «Ժողովուրդը» («Իրական պատկերը») և «Ազգը», ըստ որի զեկույցում, հակառակը, կարևորվել է «Հայաստանի տնտեսական աճի նոր մոդելը՝ ներդրումներ և մրցակցային դաշտի բարելավում»:
«Ժամանակը» իր հանգույն հայտարարել է, թե «Ամուլսարի շահագործումը հանցագործություն է», «Ժողովուրդը», թե՝ «Ոսկու շուկայում «անտերություն» է», «168 ժամը»՝ Քաղաքացիական ավիացիայի միջազգային կազմակերպության փորձագետ Յ. Մնացականովի հետ զրույցը խորագրել «Բաց երկնքի քաղաքականությունը ժամանակավրեպ է»:
«Հրապարակը» «հաստատել» է, որ «Ամերիկյան «ԿոնտորԳլոբալը» գնում է Որոտանի ՀԷԿ-երի համալիրը», «ՀԺ»-ն՝ Քաղաքաշինության նախարարի տեղակալ Ռուզաննա Ալավերդյանից տեղեկացել Հայաստանում լանջշաֆտային քաղաքականության ներդրման ուղղությամբ կատարվող գործընթացների մասին, «Հայոց աշխարհը», վկայակոչելով ԱՎԾ զեկույցը, նշել, որ «Աղքատությունը նվազում է», և «սկսվում են նկատվել դրական միտումներ»: Կուտակային կենսաթոշակային նոր համակարգի ներդրման թեման շարունակել են լուսաբանել «Ժողովուրդը», «ՀԺ»-ն և «168 ժամը»:
