Հայաստանի Հանրապետության Կառավարություն

«ՀՀ»-ն և «Ազգը» ներկայացրել են ՀՀ վարչապետին կից արդյունաբերության խորհրդի երեկվա նիստից մանրամասներ և կարևորել, որ 2014-ի հունվար-փետրվարին կսկսվեն հայկական դյուրակիր համակարգիչների՝ պլանշետների զանգվածային արտադրությունը և վաճառքը: «168 ժամի» հետ զրույցում Technology and Science Dynamics Inc/Armtab Technologies ընկերության նախագահ Վահան Շաքարյանը այն համարել է «մեծ քայլ Հայաստանի ՏՏ ոլորտում»: «Առավոտը» վերստին անդրադարձել է «ՀայՌուսգազարդի» 20 տոկոս բաժնեմասի պատմությանը՝ հրապարակումներից մեկում ներկայացնելով ՀՅԴ-ական խորհրդարանական Արծվիկ Մինասյանի կարծիքը, թե այդ «բաժնեմասի արժեքը շատ ավելի մեծ է, քան կառավարության կողմից հայտարարված թվերը», մյուսում՝ ՀԱԿ խմբակցության ներկայացուցիչ Արամ Մանուկյանի «գազի թղթապանակը» («Իշխանությունը «ղումար» է խաղացել «ՀայՌուսգազարդի» բաժնեմասի վրա»): Թեման արծարծել են նաև «168 ժամը» («Գազի պարտքի գաղտնիքը բացահայտվել էր դեռ մայիսին»), «ՀԺ»-ն, «Ժողովուրդը», «Ժամանակը»:
«Հայոց աշխարհի» հետ զրույցում, ԱԺ պատգամավոր Մկրտիչ Մինասյանը հայտարարել է, որ «կուտակային կենսաթոշակի գաղափարը իրականացել է միայն այն երկրներում, որտեղ գործել է պարտադիր բաղադրիչը» («Մենք հեծանիվ չենք հնարել»): «Պարտադիր կուտակայինի» թեման շարունակել են քննարկել «Հրապարակը» և «Ժամանակը», որը փորձել է նաև «բացահայտել թե զգուշացնել», թե «Ի՞նչ կլինի, եթե պարտադիր կուտակայինը գործի 2014-ից»:
«Հայոց աշխարհի» հետ զրույցում փորձագետ Հարություն Մեսրոբյանը բիզնեսի վարման ցուցանիշով Հայաստանի դիրքերի բարելավման վերաբերյալ ամերիկյան Forbes վարկանիշային կազմակերպության հիշատակմանը հակադարձել է, թե «աղյուսակի կազմման հիմքում ընկած են ձևական ընթացակարգեր» («Հայաստանում բիզնես միջավայրը վատ վիճակում է»):
1988թ. ավերիչ երկրաշարժից հետո դեռևս չլուծված մեծ ու փոքր խնդիրներին են անդրադարձել «Ժողովուրդը», «Հրապարակը», «ՀՀ»-ն, «Հայոց աշխարհը», «168 ժամը»: