չորեքշաբթի, 18 դեկտեմբերի 2013
«Մեյդան բաց արեք, թող մին էլ բռնեն…»
Կիևի Մայդանում մի անգամ արդեն հաղթած հանրությունը «կհաղթի նաև այս անգամ», ուկրաինական հանրահավաքի մասնակիցներին հավաստիացրել է «ՀԱԿ ակտիվիստ, պատգամավորության նախկին թեկնածու Գայանե Առուստամյանը»: Ահա նրա «եվրատեսիլյան» դիմումը՝ ըստ «Իրավունք-հետաքննության». «Բարև, «Մայդան», բարև Կիև, բարև Ուկրաինա, Հայաստանը ողջունում է ձեզ: Ես եկել եմ այստեղ, որպեսզի ձեզ հասցնեմ հայկական դիմադրության խոսքը»: Ըստ թերթի, «սույն ակտիվիստուհին» գուցե անգիտակցաբար աջակցում է «Ուկրաինայի այն քաղաքական ուժին, որի իշխանության օրոք Ադրբեջանն Ուկրաինայից ստացել էր հսկայական քանակի սպառազինություն և անսքող քաղաքական աջակցություն և որի հաղթանակն են երազում Բաքվում և Անկարայում»: Նույն թերթը Արտակ Զաքարյանի շուրթերով վստահեցրել է՝ «Կանենք ամեն ինչ, որ 2015թ. հունվարից Եվրասիական միության հիմնադիր անդամ լինենք»:
Խորհրդարանում Էներգետիկայի և բնական պաշարների նախարարի՝ գազի խնդրի պարզաբանումները «ՀՀ»-ն ամփոփել է «Գազի գինը կմնա անփոփոխ» հոդվածում, «Իրավունքը» կարևորել է Արմեն Մովսիսյանի հայտարարությունը, թե «Ավելի էժան գազ, քան ռուսական կողմն է տալիս, ոչ ոք չի առաջարկել», «Ազգը» գրել՝ «Հայաստանի կառավարությունը պարզաբանեց, թե ինչպես է գոյացել 300 միլիոն դոլարի պարտքը Ռուսաստանին»: Թեման արծարծել են նաև «Հայոց աշխարհը», «Ժողովուրդը», «Հրապարակը», «Առավոտը» և «ՀԺ»-ն:
«Հայոց աշխարհը» արձագանքել է կենսաթոշակների պարտադիր կուտակային բաղադրիչի դեմ կազմակերպված երեկվա ցույցին և համապատասխան դիմում-բողոքը Սահմանադրական դատարան ներկայացնելու մանրամասներին՝ «Սառնամանիքը բողոքի ակցիային վնաս չէ», «ՀԺ»-ն՝ «զարմացրել» գնահատելու իր կարողությամբ՝ «Ո´չ գրպանահատությանը»: Թեմային անդրադարձը «Հրապարակը» խորագրել է «Կենսաթոշակը ստանալը մարդու իրավունքն է, ոչ թե պարտականությունը», «Առավոտը»՝ «Օրենքը չի կարող ներդրվել առանց ժողովրդի կամքը հարցնելու»:
Երեկ Գյումրիում բացված կին ձեռներեցների աշխատանքների ցուցահանդեսի մասնակիցներն «Առավոտին» ասել են, որ կառավարությունը կանանց նկատմամբ «հարկային ու վարկային ճնշող քաղաքականություն է վարում»: Ըստ «Հրապարակի», «այս օրերին գյուղական բուժամբուլատորիաների աշխատակիցներին կարելի է հանդիպել ոչ թե աշխատավայրում, այլ գյուղացիների տներում: Նրանք թղթապանակը ձեռքներին տնից տուն են մտնում և մեկառմեկ հաշվառում տվյալ հասցեում ապրող փաստացի բնակիչներին. պատճառը բնակիչների թվի նվազմամբ հիմնավորված պետական ֆինանսավորման կրճատումն է»:
«ՌԱ»-ն անդրադարձել է թեթև արդյունաբերության զարգացման խնդիրներին՝ երազելով վերականգված տեսնել ճյուղի «երբեմնի ծավալները»:
