հինգշաբթի, 19 դեկտեմբերի 2013
Քննադատության ասպարեզ՝ Ամանորին ընդառաջ
«Հայաստանի Հանրապետությունը» անդրադարձել է արդյունաբերության զարգացման հիմնախնդիրներին և դրանց լուծման նպատակով պետականորեն գործադրվող մի շարք միջոցառումներին («Աջակցության գործիքներն ըստ առաջնահերթությունների»): «Հայոց աշխարհը» նշել է, որ ՀՀ վարչապետին կից գործող արդյունաբերության խորհրդի օրերս կայացած նիստում ներկայացված հայկական պլանշետների արտադրությանը վերաբերող ծրագիրը «մտնում է գործնական փուլ», դրանք «կարտադրվեն ազատ գոտու տարածքում»: Արդյունաբերության հիմնահարցերը արծարծել է նաև «Գոլոս Արմենիին»:
«Հրապարակը» և «Հայոց աշխարհը» շարունակել են գազի գնի վերաբերյալ խորհրդարանական բուռն լսումների և, հատկապես, Էներգետիկայի և բնական պաշարների նախարարի պարզաբանման շուրջ տարաբնույթ մեկնաբանությունների հրապարակումը, «Ժողովուրդը» «նվաստացուցիչ» է որակել խորհրդարանի հաստատմանը ներկայացված հայ-ռուսական համապատասխան համաձայնագրերը:
«168 ժամը» կուտակային կենսաթոշակային համակարգին հերթական անդրադարձը խորագրել է «Սև փողերի հինգ տոկոսը», «Հրապարակը»՝ ավելի «հեռուն գնացել», թե իբր առհասարակ «Պետությունը պարտադիր պայմաններով քամում է հասարակությունը»: Թեման կենսաթոշակային «երաշխիքային ֆոնդի կառավարման…մասով» արծարծել է նաև «Ժողովուրդը»:
«ՀԺ»-ն, թերևս կառավարությանն անվստահություն հայտնելու ՀԱԿ կուսակցության երեկվա հաղորդագրության ի պատասխան, բարձրաձայնել է իր «օրակարգային հռետորական» հարցը՝ «Կտապալե՞ն»: ՀԱԿ-ի երեկվա գործողությանը արձագանքել են նաև «Ժողովուրդը» և «168 ժամը», որը մի այլ հրապարակման մեջ էլ փորձել է «բացահայտել» ՀՀ գանձապետական համակարգում կատարվող փոփոխությունները («Քանդել՝ նորը չկառուցելու համար»):
