Հայաստանի Հանրապետության Կառավարություն

Ազգային ժողովի այսօրվա արտահերթ նստաշրջանի օրակարգը մամուլին մղել է տարատեսակ, երբեմն՝ իրարամերժ մեկնաբանությունների և նույնքան արտառոց եզրակացությունների։ Եթե «Իրավունքը» գազի սակագնին վերաբերող հայ-ռուսական պայմանագիրն «հանգիստ» է ընդունում («նշված պայմանագրով լուծվում է բոլոր պարտքերի հարցը և ֆիքսվում 1000 խմ-ի դիմաց հայաստանյան սահմանին 189 դոլար սակագին»), ապա «Ժողովուրդը» գտնում է, որ «Հայաստանն ավելի ռուսամետ է, քան ՌԴ-ն»։ Արձանագրելով, որ «ռուսական որևէ կազմակերպություն՝ «Գազպրոմից» բացի, իրավունք չունի գազ ներկրելու», «Առավոտն» առաջարկում է սպասել մինչև 2043 թվականը. «կա հավանականություն, որ 2043 թվականից հետո իրավիճակը կփոխվի»։
 

Ադիբեկյանի թվերը

Դրանցից ամենաթարմն այն է, որ «Հայաստանի ամեն տասներորդ ընտանիքը սոված է պառկում քնելու» («Ժողովուրդ»)։ Եվ չնայած նախարար Արմեն Երիցյանն այս թերթին հավաստիացնում է, որ «շատ ժամանակ մարդիկ չեն սիրում աշխատել, չեն ձգտում աշխատանք փնտրել ու իրենց հացը վաստակել», իսկ նախարար Արմեն Մովսիսյանը համոզմունք է հայտնում, որ ինքն իր ոլորտում «արել է մաքսիմումը, որպեսզի ոչ ոք սոված չքնի», ՀԱԿ-ը հայտարարել է, որ «ԱԺ առաջիկա նստաշրջանում կառավարությանն անվստահություն հայտնելու հարց է հարուցելու» («Հրապարակ»)։ Ավելին, ՀԱԿ խմբակցության պատգամավոր Լյուդմիլա Սարգսյանն «ՀԺ»-ին ասել է, որ հարցը «վաղուց է հասունացել» և 7 տոկոս տնտեսական աճ չապահոված կառավարությունն անկասկած պետք է հեռանա։
 

Ինչպիսին պետք է լինի «կուտակայինը»

ՀԱԿ տնտեսագետ Վահագն Խաչատրյանի կարծիքով կուտակային համակարգը պետք է լինի կամավոր. «… եթե մարդիկ իմանային, որ նույնիսկ պարտադիր հիմնադրամից կարող են օգտվել ոչ թե 23-50 տարի հետո, այլ 10 տարի հետո, ինչն առաջարկում էր նաև ՀԱԿ-ը, ապա այսքան դժգոհություն չէր լինի։ Մարդկային հոգեբանության մեջ 10-15 տարին նորմալ է ապագայի ծրագրեր կառուցելու համար» («Առավոտ»)։
«Դելովոյ էքսպրեսի» զրուցակիցներն առաջարկում են փոխել շրջանառության հարկի դրույքաչափը, իսկ պրոֆեսոր Թ.Մանասերյանը կառավարությանը խորհուրդ է տալիս տնտեսական քաղաքականություն մշակելիս ավելի ակտիվորեն ներգրավել փորձագետների («ՌԱ»)։
 

Այլևայլ

Մի շարք հրատարակչություններ, որոնք տեղավորված են Իսահակյան 28 շենքում, հանկարծակիի են եկել իրենց տարածք տրամադրելու կառավարության սահմանած չափորոշիչներից և ենթադրում են, որ դրա նպատակը «ողջ շենքը» «փաթեթով» վաճառելն է»։
«Դելովոյ էքսպրեսը» լուսաբանել է կանանց բիզնեսի զարգացմանը նվիրված համաժողովի աշխատանքը՝ «ինչո՞ւ է տեղապտույտ տալիս կանանց բիզնեսը», «ՌԱ»-ն մատնացույց է անում կոոպերացման միջոցով գյուղատնտեսության արդյունավետությունը բարձրացնելու ուղին, «Ժողովուրդը» հետևում է ոսկու շուկայում ծայր առած ստուգման ընթացքին՝ «Վաղարշը հերթական անգամ տուգանվելու է»։