չորեքշաբթի, 25 դեկտեմբերի 2013
Լավ հարևանը և լավ բարեկամը
«Իրավունք-հետաքննությունը» Հայաստանի Մաքսային միությանն անդամակցելը դիտարկում է «Ռուսաստանի հարավային՝ Իրան-Սիրիա, այսինքն՝ Միջերկրական ծովի արևելյան հատվածի և Պարսից ծոցի ուղղությամբ» ձևավորվող աշխարհաքաղաքական իրողությունների համապատկերում: Թերթը մեջբերում է նաև վրացական աղբյուրներ, որոնց վկայությամբ Աջարիան, օրինակ, «լիովին գտնվում է թուրքական բիզնեսի վերահսկողության տակ», ավելին, «Բաթումից մինչև Ադրբեջանի սահմանը տիրում է թուրք-ադրբեջանական բիզնեսի տոտալիտար գրոհը»: Այս պայմաններում թերթը կարևորում է Հայաստանի ինտեգրումը Մաքսային միությանը:
«Հայաստանը զգալի առաջընթաց է գրանցել համաշխարհային ֆինանսական ճգնաժամից վերականգնվելու և իր տնտեսությունը վերակողմնորոշելու ուղղությամբ», - հայտարարել է ԱՄՀ պատվիրակության ղեկավարը, - «սակայն էական մարտահրավերները պահպանվում են: Դրանց թվում են արձագանքը 2013թ. աճի տեմպի դանդաղմանը, վերջին տարիների մասնավոր և օտարերկրյա ուղղակի ցածր ներդրումներին և համեմատաբար բարձր աղքատությանն ու գործազրկությանը» (Ազգ):
Այնուամենայնիվ, կառավարությունը ըստ «Հրապարակի», մտադիր է 2015թ. «աշխատավոր դասի համար իրականացնել նաև պարտադիր առողջապահական ապահովագրությունը»:
Լուծելի և «անլուծելի» խնդրականներ
Պետական գույքի կառավարման վարչության պետի երեկվա մամուլի ասուլիսին անդրադարձել են «ՀՀ»-ն, ըստ որի «Ոլորտում անլուծելի խնդիրներ չեն լինի» և «Ազգը», որ պարզապես մեջբերել է Արման Սահակյանի հայտարարությունը, թե «Ներդրումային պարտավորությունները չկատարող սեփականատերերը կտուգանվեն»:
«Հայոց աշխարհը» արձագանքել է «Զվարթնոց» օդանավակայանի հին մասնաշենքը չքանդելու ՀԽ-ի դիմումին («Հանրային խորհուրդն ասաց իր տղամարդու խոսքը») և Սևանա լճում ցանցավանդակային տնտեսության ստեղծմամբ իշխանի արտադրություն իրականացնելու համալիր ծրագրի նախագծին («Սևանը կվերածվի իշխաններով լի ակվարիումի»), «ՀԺ»-ն՝ ներկայացրել իր «հատուկ» վերաբերմունքը ջերմոցային տնտեսությունների խթանման հայեցակարգին, գրելով, թե իբր «ունենք հերթական մի «փաստաթուղթ», որը ստեղծվել է միայն ստեղծված լինելու նպատակով»:
Իրականանալի ծրագիր
«Հրանտ Մաթևոսյան» հիմնադրամի հիմնադիր-հոգաբարձու Վերժինե Մովսիսյանը երկրի ղեկավարությանը հիշեցնում է «Հրանտ Մաթևոսյան» հաստատության կառուցման ու գործարկման անհրաժեշտությունը: «Լուծված չէ կառուցումն ապահովելու ամենահիմնական՝ ֆինանսական խնդիրը», - գրում է տիկին Վերժինեն («Առավոտ»):
Իսկ ի՞նչ է գրում «Ժողովուրդը»
Այս թերթը նախանձելի հետևողականությամբ շարունակում է կառավարության գործունեության ավարտի «հետհաշվարկը»: «Ժողովուրդը» նաև ժամանակ է գտել հաշվելու պետական պաշտոնյաների անձնական ունեցվածքը և առաջարկել դրա «ընդամենը մի մասի գնով «քեշ» մարել իրենց պատճառով գոյացած ռուսական պարտքը»:
