ուրբաթ, 10 հունվարի 2014
Մոտավոր անկեղծություն
ՀԱԿ քաղխորհրդի անդամ Զոյա Թադևոսյանը անկեղծորեն խոստովանում է, որ վարչապետի ասուլիսին ծանոթ չէ, բայց «մոտավորապես» գիտե, թե ինչ մակարդակի կարող էր լինել այն: Այնուամենայնիվ, «Առավոտը» չի հրաժարվել հարցազրույցից և իր էջի մի մասը լցրել է սույն տիկնոջ մոտավոր դատողություններով, որոնցից ամենանշանակալիցն այն տեսլականն է, թե երանի հասարակության ակտիվ աջակցությամբ հնարավոր լիներ «օր առաջ ազատվել այս իշխանություններից»: Նման երազանք ունի նաև «Ժամանակը», որին ոգևորել է «ներիշխանական պայքարի նոր երանգավորումը», ինչպես նաև կառավարության գործունեության քննարկումը, որը թերթն սպասում է փետրվար-մարտին: «Առավոտից» նաև իմանում ենք, որ Հայաստանում առ այսօր «ամեն ինչ գնում է» կառավարման փորձագետ Հարություն Մեսրոբյանի՝ դեռևս 2009-ին կառուցած «ճգնաժամի կորի տրամաբանությամբ»: Մասնագետն առաջարկում է «շատ լուրջ սկսել ուղղակի վերափոխել մեր պետությունը, շատ արագ ու բավականին կոշտ մեթոդներով»:
Ճանապարհային քարտեզի գույները
«ՀԺ»-ն պարզել է, որ «Մաքսային միություն մտնելու «ճանապարհային քարտեզը», որի բովանդակությանն այդքան ծարավի է հայ հանրությունը, վաղօրոք «ընդհանրապես չի հրապարակվելու», այլ հայտնի է դառնալու ՄՄ-ին անդամակցելուց հետո միայն: «Ժամանակին» արդեն իսկ հայտնի է, որ «Հայաստանը կդառնա Կալինինգրադ և կօգտագործվի Վրաստանի դեմ»: Անկախ դրանից, ՀՀ պաշտպանության նախկին նախարարի կարծիքով «մեր երկիրը գնում է ինտեգրացիոն ճշգրիտ ուղիով» («ՀԱ»):
Երկարատև արձակուրդի գործոնը
Ամանորի 10-օրյա արձակուրդը ըստ «ՀԺ»-ի խիստ մտահոգել է նախկին վարչապետ Հրանտ Բագրատյանին՝ «Կոլեկտիվ սովորում ենք ծուլությանը»: Ինքը՝ Բագրատյանը չի ծուլացել և հաշվել ու թվերի օգնությամբ ապացուցել է, որ, օրինակ, նույն պատճառով «ֆրանսիական տնտեսությունը տարին տարվա վրա վատանում է»:
Ավելի լավատես է արձակագիր Լևոն Ջավախյանը, ով մաղթում է, որ իր ընթերցողներն ու «ամբողջ հայ ժողովուրդը» իրենց առջև նպատակ դնեն, նույնը ցանկանում է «պետական այրերին ու մայրերին»:
