շաբաթ, 11 հունվարի 2014
Օգուտի և վնասի հարաբերակցությունը
«Ժամանակն» ու «ՀԺ»-ն շարունակում են պնդել, որ Մաքսային միության տալիք օգուտը մեր երկրին անհամեմատելի է այն առավելության հետ, որ կարող էր ունենալ Ասոցացման համաձայնագիրը: Իբրև ասվածի ապացույց է հրամցվում այն, որ իբր վարչապետն էլ իր հայտնի ասուլիսում չի նշել Մաքսայինից ակնկալվող օգուտը («Ժամանակ»): Հարցին անդրադառնում է նաև «ՀԱ»-ն, ըստ որի բանակցության ընթացքում Հայաստանը հակված է մաքսատուրքերի ավելի բարձր դրույքաչափերի կիրառումից սպասվող գնաճը զսպելու նպատակով ստանալ որոշակի արտոնյալ ժամանակահատված: ՀԴԿ նախագահ Արամ Սարգսյանն այն կարծիքին է, որ Մաքսայինին միանալու «խոշոր և կարևորագույն» որոշումը կայացնելուց հետո իշխանությունը պարտավոր էր ներկայացնել իր «քաղաքական որոշման հիմնավորումը, այդ որոշման առանձնահատկությունը, դրա առավելությունը»: Եվ ընդհանրապես, «այսօրվա իշխանությունն իրավունք չունի գլուխը հանգիստ բարձին դնելու ու քնելու» («Առավոտ»):
Հետտոնական մտահոգություններ
Դրանք առաջին հերթին թելադրված են գնաճով: «ՀԺ»-ն թվարկում է՝ գազի և էլեկտրաէներգիայի թանկացմանը կարող է գումարվել տրանսպորտի, սննդամթերքի որոշ տեսակների թանկացումը: Սակայն թերթը «գնաճի ոչ մի տնտեսագիտական հիմնավորում» չի տեսնում: Նույնիսկ աշխատավարձի և կենսաթոշակի ավելացումը թերթի աչքին չի երևում, մանավանդ, որ որոշ աշխատավարձեր ավելի կնվազեն՝ «կապված կուտակային կենսաթոշակային համակարգի ներդրման հետ»: Իսկ թե ինչ պետք է անել, որ կենսաթոշակային բարեփոխումը ծառայի իր նպատակին, «ՀԱ»-ի ընթերցողին պարզաբանում է պրոֆեսոր Մանասերյանը՝ «իմ առաջարկը եղել է և մնում է նույնը՝ կենսապահովման նվազագույն զամբյուղից ցածր աշխատավարձերից մասհանումներ չպետք է արվեն»: Ամեն դեպքում խորհրդարանական ընդդիմությունն այս հարցում միասնական է և շարունակելու է կուտակայինի դեմ ուղղված պայքարը («ՀԺ»): Ավելին, վիճարկվելու է նաև Հայռուսգազարդի 20 տոկոս մասնաբաժնից հրաժարվելու որոշումը:
Մամուլը փոխանցում է բնապահպանական խնդիրների վերաբերյալ «Էկոլուր» տեղեկատվական կենտրոնի ղեկավարի մտահոգությունը («Առավոտ», «ՀԱ»), արծարծում խաղատնային բիզնեսի և հեռուստատեսային գովազդի մերօրյա դրսևորումների հարցը («Ժամանակ»):
