Հայաստանի Հանրապետության Կառավարություն

«Հրապարակը» «որոշել» է, որ «ողջ երկիրն այս օրերին ուշի-ուշով հետևում է, թե ինչ ճակատամարտ է ընթանում» ՀՀ երկրորդ նախագահի և գործող իշխանության միջև, և «ճակատային» թեմայով մի շարք ուշագրավ հոդվածներ առաջարկել. «Քոչարյանը պաշտպանում է թիմին, իսկ թիմը նրան՝ ոչ», «Մովսիսյանի և Աշոտյանի սև թուղթն էլ եկավ», «ՀՀԿ-ական հնաբնակ պատգամավորների հակասական կարծիքները», «Ու չկա մեկը, որ ասի ճշմարտությունը»։ Թեման հուզել է նաև «Ժողովուրդին» («Թասիբի է գցում»), «168 ժամին» («Երբ բանավիճում են կատարողները»), «Առավոտին» («Ցանկացած իշխանության տարիներին և լավ բաներ են լինում, և վատ») և «Ժամանակին», որը կարևորել է, որ «բնակֆոնդը և՛ Քոչարյանի տարիներին, և՛ նրանից հետո նույն չափով է աճել»։

Դժվարին ընտրության պահը
«Հայաստանի Հանրապետությունը» ֆինանսների նախարարության ֆինանսական վերահսկողության տեսչության պետ Սոնա Ղարիբյանի երեկվա ասուլիսի անդրադարձում նշել է, որ ըստ 2013թ. ընթացքում կատարված ստուգումների «տեսչությունը խախտումներ է հայտնաբերել բոլոր ոլորտներում», և «պաշտոնյաները ներգրավվել են որպես մեղադրյալ»։ «Առավոտը» մտահոգություն է հայտնել, թե տեսչությունը «ամեն անգամ… չարաշահումներ ու խախտումներ է հայտնաբերում, բայց պատժվում են ընդամենը միջին օղակի պաշտոնյաներ»։
«Հայոց աշխարհը» ներկայացրել է կենսաթոշակային նոր համակարգի վերաբերյալ տնտեսագետ Վարդան Բոստանջյանի գնահատականները («Անլուծելի խնդիրներ չկան. պետք է փնտրել ելքեր»)։ «Առավոտը» նոր համակարգի շուրջ զրուցել է «Սոցիոմետր» կենտրոնի ղեկավար Ահարոն Ադիբեկյանի և «Ընդդեմ պարտադիր կուտակային կենսաթոշակի» նախաձեռնության անդամ Դավիթ Խաժակյանի, «168 ժամը»՝ ԿԲ ֆինանսական համակարգի կարգավորման վարչության պետ Մհեր Աբրահամյանի հետ («Յուրաքանչյուր ռեֆորմի մեկնարկ մի փոքր դժվար է. ՀՀ քաղաքացիները չեն շտապում կենսաթոշակային ֆոնդեր ընտրել»)։

Այլևայլ
«168 ժամի» հետ զրույցում «Չեթեմ հաուս» կենտրոնի Ռուսաստանի և Եվրասիայի ղեկավար Ջեյմս Նիքսին ներկայացրել է Հայաստանի՝ ՄՄ անդամակցության վերաբերյալ իր «հավակնոտ» դիտարկումը՝ «Ռուսաստանը հաղթեց այս ռաունդում, բայց սա խաղի վերջը չէ»։
«ՀԺ»-ն գրել է, թե ՀՀ կառավարությանը պատկանող «Հայռուսգազարդի» վերջին 20 տոկոս մասնաբաժինը «Գազպրոմին» հանձնելու վերաբերյալ պայմանագիրը ստորագրվել է «վերջին պահին», «չմոռանալով» «Հայռուսգազարդի» վերանվանումը «Գազպրոմ Արմենիա»-ի որակել «լրիվ թիթիզություն»։