չորեքշաբթի, 29 հունվարի 2014
Բանակի օրվա առթիվ
Հայոց բանակին նվիրված տոնական միջոցառումների անդրադարձը օրվա մամուլում ոչ միայն զգալի տեղ է գրավել, ինչը բնական է, այլ նաև «բացահայտել» ինքնօրինակ խորհրդածություններ: «Հրապարակը», օրինակ, «այս տարի մեծ շուքով» անցկացվող միջոցառումների թվարկումը «համեմել» է «բանակում տիրող վիճակի դեմ» բողոքող «մի խումբ քաղաքացիների» կազմակերպած ակցիային կարճ արձագանքով, մի այլ հրապարակման մեջ էլ ներկայացրել ազատամարտիկներ Մյասնիկ Մալխասյանի և Սասուն Միքայելյանի տեսակետները: «Ժամանակը» իր հանգույն փորձել է պարզաբանել, «ինչպես են փչանում տոները», «Ժողովուրդը»՝ Պաշտպանության նախարարի հետ կազմակերպած բովանդակալից զրույցը խորագրել «2014 թվականը՝ արատավոր բարքերի վերացման տարի»:
Շրջանառության հարկի «փոխզիջումը»
«Մաքսային միությանը Հայաստանի անդամակցության առաջին շոշափելի հետևանքը լինելու է բազմաթիվ ապրանքների թանկացումը», հայտարարել է «ՀԺ»-ն և, որպես ասվածի հիմնավորում, հիշատակել «Էկոնոմիկայի նախարարության պատրաստած առայժմ ոչ հրապարակային փաստաթուղթը»: «Հայոց աշխարհի» հետ զրույցում ՀԳՀՄ-ի նախագահ Գագիկ Մակարյանը նշել է «Շրջանառության հարկի մասին» օրենքում դրույքաչափի փոփոխության նպատակով ընթացող գործընթացները և պարզաբանել առաջարկված «փոխզիջումային տարբերակը»: Մի այլ հոդվածում թերթն անդրադարձել է «այն օբյեկտիվ և սուբյեկտիվ գործոններին», որոնք իրենց «ուղղակի կամ անուղղակի ազդեցությունն» են թողել տնտեսական աշխուժության վրա, պայմանավորելով «տնտեսական աճի» ավելի փոքր մակարդակը:
Այլևայլ
«Ժամանակը» «նկատել» է «ներիշխանական հակադրության զուգահեռ գործառույթ» և փորձել այն «բացահայտել»:
«ՀԺ»-ն ՌԴ 1-ին կարգի պետական խորհրդական Մոդեստ Կոշերովի հետ զրույցը և վերջինիս «հավակնոտ» գնահատականները «ամփոփել» է «Արտագաղթ կամ ճորտատիրություն» խորագրի տակ:
