շաբաթ, 1 մարտի 2014
«Մեյդան բաց արեք, թող մին էլ բռնեն…» - 2
Նախկին արտգործնախարար Ալեքսանդր Արզումանյանից տեղեկանալով, որ ժողովուրդը սովորաբար ինքն է որոշում իշխանափոխության ժամանակը, զգացմունքի հորդումից շնչասպառ եղած «168 ժամը» հարցնում է՝ «Այսինքն՝ Մայդանից խուսափել հնարավոր չի՞ լինի, մո՞տ է դժգոհությունների պայթյունի օրը»: Տեսնելով հարցնողի օրհասական վիճակը, նախկին արտգործնախարարը մեծահոգաբար պատասխանում է՝ «Այո, անշուշտ»: Ուրիշ է թերթի մեկ այլ զրուցակցի՝ Եվրոպայի հայկական միությունների ֆորումի նախագահ Աշոտ Գրիգորյանի հոգսը: Բանն այն է, որ անպատասխան է մնացել ՀՀ բարձրագույն իշխանությանն ուղղված հիշյալ ֆորումի նամակը. մինչդեռ Գրիգորյանը վստահ էր, որ երկրի նախագահը «հսկայական թվով չինովնիկներ ու նախարարներ», այդ թվում՝ վարչապետին, աշխատանքից հեռացնելու էր և դիմեր իրեն՝ «Իսկ Դուք, պարոն Գրիգորյան, բարի եղեք գալ ՀՀ, միանալ մեզ և ձեռք ձեռքի տված համատեղ աշխատել»: Թե ի՞նչ պաշտոնում էր Գրիգորյանը պատրաստվում «համատեղ աշխատել»՝ համեստորեն չի ասում: Բայց զգուշացնում է. «…եթե մենք պատասխան չստանանք, մեր հաջորդ քայլը կլինի շատ դաժան ու ոչ կոմպրոմիսային»:
Իշխանափոխության տարբերակներ են առաջարկում նաև «ՀԺ»-ի, «Ժողովուրդի» հոդվածագիրները:
Օրենքի տառն ու ոգին
«Բարեփոխմանն այլընտրանք չունենք», - ընդունելով ՀԽ անդամներին, ասել է վարչապետը: - Երկրի նորանկախ պետության պատմության մեջ չի եղել մի դեպք, երբ օրենքն ընդունվի և ուժի մեջ մտնի երեք տարի անց» («ՀՀ»):
Կուտակայինի ներդրմանը վերաբերող «Ժողովուրդի» հարցերին է պատասխանել Էդ.Շարմազանովը:
Մեծ արձագանք են ստացել առողջապահության նախարարի հակասական հրամանները՝ «Նախարարությունը փոշմանեց» («ՀԺ»), «Պոլիկլինիկաներում համավճար կկիրառվի հուլիսի 1-ից» («Ժամանակ»), «Դումանյանի՝ ստվերի դեմ պայքարի համավճարային մեթոդը սխալ մեթոդ է» («Առավոտ»):
«Ժողովուրդը» պարզել է, որ որդալվիճը, որի դեմ պայքարելու համար Կառավարությունը գումար է հատկացրել, «Էռնեկյանի այգիներից է տարածվել»:
«ՀԱ»-ն ավարտում է «Ավելի լավ է 100 հոգի ունենա սեփական խանութ, քան մեկը՝ 100» հոդվածը, որտեղ շարադրված է ՕԵԿ տեսակետը առևտրի փոքր օբյեկտների զարգացման վերաբերյալ, իսկ «Ժամանակը» փորձում հասկանալ, թե «ինչու է Կառավարությունը ԵԿՄ-ի համար տարածք գնել»:
