հինգշաբթի, 13 մարտի 2014
Օրենքի հոգեբանությունը
Խորհրդարանում «Հեռուստատեսության և ռադիոյի մասին» և «Գովազդի մասին» օրենքներում փոփոխություններ նախատեսող նախագծի առաջին ընթերցմամբ ընդունումը մտահոգել է «Հայոց աշխարհին», որն էլ ցանկալի է համարել, որ «նախագծի ընդունման հետևանքով հետագայում պետությունը ստիպված չլինի պետական գանձնարանից միջոցներ հատկացնել հարբեցողության դեմ պայքարելու համար» («Թունդ ոգելիցը կհայտնվի էկրանին»): Թեման ուշագրավ խորագրերի ներքո արծարծել են նաև «168 ժամը» («Օղու էֆեկտը»), «Հրապարակը» («Օրենքը հոգեբանություն է նախևառաջ») և «Ժողովուրդը» («Օղու գովազդը գիշերով թույլատրելի է»), որը մի այլ հրապարակման մեջ էլ, անդրադառնալով խորհրդարանում քննարկվող «ՀՀ դատական օրենսգրքում փոփոխություններ կատարելու մասին» օրինագծին, պարզապես գրել է, թե իբր «Վարչապետը սահմանափակում է նախագահի լիազորությունները»:
«ՀԺ»-ին առավելապես հետաքրքրել է ԱԺ-Կառավարություն հարցուպատասխանի ընթացքում ԱԺ պատգամավոր Նիկոլ Փաշինյանի հայտարարությունը ազատամարտիկ-ակտիվիստ Վոլոդյա Ավետիսյանի գործունեության «վիճակագրության» վերաբերյալ, «Ժամանակին»՝ թե ինչու «հարցուպատասխանի ժամանակ… դահլիճը գրեթե դատարկ էր»:
Գնահատումների խորհուրդը
«Ժողովուրդը» անդրադարձել է հունվար ամսվա ընթացքում կատարած ապրանքաշրջանառության վերաբերյալ ԱՎԾ հրապարակմանը և փորձել համոզել, թե նախորդ տարվա նույն ժամանակահատվածի համեմատ այն նվազել է: «Ժամանակը» փոխանցել է տնտեսագետ Վահագն Խաչատրյանի նկատառումը, թե «Առանց Ուկրաինայի մաքսային միությունն արդյունավետ չի լինի», մի այլ հրապարակման մեջ էլ նկատել, որ ԿԲ-ն անցյալ շաբաթ $96,5 մլն դոլար է վաճառել՝ դրամի արժեզրկումը կանխելու համար»: «ՀԺ»-ին հետաքրքրել է ՌԴ ֆինանսական շուկայում տիրող իրավիճակը և դրա հնարավոր «ազդեցությունը… Հայաստանի վրա», «Հայոց աշխարհին» այն, որ այնուամենայնիվ «Ռուսական տրանսֆերտները տարեսկզբին ավելացել են»
«Ժամանակը» փոխանցել է նախկին վարչապետ Արմեն Դարբինյանի համոզմունքը, թե «ՀՀ-ում բիզնես մթնոլորտը «լավը չէ» և «դա պայմանավորված է նրանով, որ մենք 22 տարի շարունակ ճիշտ չենք վարել երկիրը»: «ՀԺ»-ն նախկին վարչապետի հետ զրուցել է արտագաղթի մասին («Արտագաղթի պատկերը լավը չէր»), «Հրապարակը»՝ կուտակային բարեփոխումների («Սլավոնականի ուսանողների փոխարեն ռեկտորն է ակտիվացել»):
Այևայլ
«Առավոտը» ԲՀԿ-ՀԱԿ հանդիպման առիթով հարցրել է՝ «Ավելի փոքր» կուսակցությունները կմիանա՞ն ԲՀԿ-ին», «Ժամանակը» թե՝ «Քառյակի օրակարգում կա՞ նախագահի հրաժարականի հարցը»: Վերջինս նաև գրել է, թե «խորհրդարանում պատրաստվում են լսումներ անցկացնել, այսպես ասած՝ ֆեյքերի մասին օրինագծի կապակցությամբ»՝ «չմոռանալով» այն որակել «խորհրդանշական»:
