շաբաթ, 22 մայիսի 2010
ԱՄՀ-ն կորցրել է նաև Բագրատ Ասատրյանի վստահությունը
«Հայաստանի Հանրապետությունը» և «Կապիտալը» լուսաբանել են ՀՀ վարչապետի այցը Սանկտ Պետերբուրգ և այցի արդյունքները:
«Հայկական ժամանակը» ափսոսում է այն ասֆալտը, որը փչացել է Հրազդանի ձորում երեկ տեղի ունեցած փլուզման հետևանքով: Բանն այն է, որ թերթի տվյալով «ՀՀ կառավարությունը վարչապետ Տիգրան Սարգսյանի գլխավորությամբ և իշխանական ջահելների` մերօրյա կոմերիտականների» մասնակցությամբ Հրազդանի կիրճում պետք է շաբաթօրյակ անցկացներ: Հիմա ի՞նչ է լինելու...
Պատասխանելով «Ժամանակի» հարցերին, «ԿԲ նախկին նախագահ» Բագրատ Ասատրյանը խորհուրդ է տալիս միանշանակ չգնահատել անցած չորս ամիսների տնտեսական աճը, քանզի հրապարակված տվյալները «լուրջ անհանգստանալու հիմքեր» են տալիս, մասնավորապես այն, որ ապրիլին մարտի նկատմամբ արձանագրվել է ՀՆԱ-ի մոտ 6 տոկոս անկում: Բացի այդ, ԿԲ նախկին նախագահը «այլևս լուրջ չի վերաբերվում» ԱՄՀ Հայաստանի ներկայացուցչությանը, չնայած այն «մեծ ջանքեր է ներդրել համակարգային բարեփոխումների ակտիվ շրջանում»: Այս խնդրում Բագրատ Ասատրյանի կարծիքը լիովին համընկնում է Հրանտ Բագրատյանի կարծիքին. վերջինս նույնպես թերահավատ է ԱՄՀ «ջահելների» տնտեսական վերլուծության և կանխատեսման վերաբերմամբ, բայց «168 ժամի» Բաբկեն Թունյանի դիտարկմամբ նրանք «երբեմն նաև մատնանշում են մեր տնտեսության ամենախոցելի կողմերը», օրինակ` օլիգոպոլիաների գոյությունը:
Հրանտ Բագրատյանի մամուլի ասուլիսին «Նովոյե վրեմյան» այսօր է անդրադարձել` հընթացս փոխանցելով հերթական «համաղետը» վերապրածների կարծիքը, որ «եթե Բագրատյանը տնտեսությունից որևէ բան հասկանար, ապա մենք խոր փոսում չէինք հայտնվի»:
Ոչ թե անբարվոք, այլ «շատ վատ» եղանակից է բողոքում ՀՀ գյուղատնտեսության նախարարը` «Հայոց աշխարհում» հանգամանորեն ներկայացնելով ոլորտում ստեղծված վիճակը և կառավարության ձեռնարկած քայլերը:
