չորեքշաբթի, 26 մայիսի 2010
Ինչ պետք է անել, որ չի արվում
«Հայկական ժամանակը» խիստ կարևորել է Կարինե Մինասյանին զբաղեցրած պաշտոնից ազատելու և ՀՀ էկոնոմիկայի նախարարի առաջին տեղակալ նշանակելու վարչապետի երեկվա որոշումները. «Դժվար է միանշանակ պնդել, թե Կարինե Մինասյանի անսպասելի ազատվելը պաշտոնից վարչապետի պարտությունն էր` Գագիկ Խաչատրյանի հետ ճակատամարտում, բայց բիզնեսի ներկայացուցիչները հենց այսպես են մեկնաբանում տեղի ունեցածը»:
Տեղեկացնելով, որ երեկ ֆոնդային բորսայում մեկ դոլարն արժեցել է 380.77 դրամ, նույն թերթը անիմաստ է համարում նշել, որ «դրամի այսպիսի արժևորումն անդառնալի հարված է հասցնում տնտեսությանը` խոչընդոտելով արտադրողներին և արտահանողներին, միևնույն ժամանակ նպաստելով ներմուծման աճին: Սրանից շահում են միայն խոշոր ներկրողները»:
«ՀԺ»-ն, անդրադառնալով ջրի թանկացման և քաղաքապետարանի կողմից դրա սուբսիդավորման թեմային, հիշեցնում է գազի թանկացումը սուբսիդավորելու վերաբերյալ վարչապետ Տիգրան Սարգսյանի արտահայտած այն միտքը, թե ինքը խորհուրդ է տալիս, որ այսուհետ ոչ ոք խորհուրդ չտա սուբսիդավորել սակագինը: Թերթը դրան հավելում է իր կարծիքը. «...այսպիսի սուբսիդավորումն ինքնին մեծագույն հիմարություն լինելով` նաև օգտագործվում է էժանագին ինքնագովազդների համար: Հիմա դրանից որոշել է օգտվել Գագիկ Բեգլարյանը` դրա համար ծախսելով մեր` հարկատուներիս վճարած հարկերը»:
«Առավոտը» տպագրել է նախկին պոլիտեխնիկի աշխատակից Հրայր Կարապետյանի` ՀՀ նախագահին, վարչապետին և ԿԳ նախարարին ուղղած բաց նամակը, որտեղ առաջարկում է, «ելնելով հանրապետության ապագայից», վերականգնել պոլիտեխնիկական և գյուղատնտեսական ինստիտուտները` դա բացատրելով տնտեսության մի շարք ճյուղերում կադրերի պակասով:
«Կապիտալը» անդրադարձել է ՀՀ կառավարության վաղվա նիստի օրակարգի հարցերից մեկին. «Գյումրու տեխնոպարկը կկլանի ևս 200մլն դրամի պետական միջոցներ, իսկ արդյունքները դեռ տեսանելի չեն»: Հիշեցնելով, որ դեռևս 1.5 տարի առաջ էկոնոմիկայի նախարարը հայտարարել էր, թե տեխնոպարկը կֆինանսավորվի նաև մասնավոր հատվածից, հոդվածի հեղինակ Արեմենակ Չատինյանը մատնանշում է, որ դա ոչ միայն իրականություն չի դարձել, այլև այս տարի նախորդի համեմատ պետությունն ավելացնում է աջակցության չափը: Ավելին, վաղվա փաստաթղթերի նախագծում նույնիսկ չի նշվում, թե 2009թ. հատկացված գումարն ինչ արդյունք է տվել:
