հինգշաբթի, 27 մայիսի 2010
Վարչապետի մեկուսացումը, տերովի և անտեր հոբելյարները
Վարչապետի «մեկուսացման» վարկածն առաջ է քաշել «Հայկական ժամանակը»` իբրև ապացույց ներկայացնելով մի շարք կադրերի «ճակատագիրը»` Ահարոն Չիլինգարյան, Արտակ Շաբոյան և վերջապես Կարինե Մինասյան. «Տիգրան Սարգսյանը ոչ մի կերպ չի կարողանում իր թիմակիցներին ՊԵԿ-ում տեղավորելուց հետո պաշտպանել նրանց»:....«Կառավարությանն առընթեր այս հիմնարկությունը, բառիս ամենավատ իմաստով, ավելի զորեղ ու ազդեցիկ է, քան ամբողջ կառավարությունը»: Այս դիտարկումից հետո հոդվածի հեղինակ Հայկ Գևորգյանը բնութագրում է ՊԵԿ-ի և անհասկանալի «իմաստ և նշանակություն» ունեցող էկոնոմիկայի նախարարության գործառույթները և կանխատեսում այդ գերատեսչությունների մոտալուտ ապագան:
«Առավոտը» նկարագրում է վարչապետի այցը Տավուշի մարզ, «Հայոց աշխարհը» փորձում պարզաբանել, թե «Ի՞նչ նպատակով են արժևորում դրամը» և դժվարանում այդ անել, «Հայքը» փոխանցում է Աբգար Եղոյանի այն մտահոգությունը, թե «Հայաստանի ոչ պարենային ապրանքների 90 տոկոսը չունի հայերեն մակնշում», «Հայոց աշխարհը» և «Գոլոս Արմենիին» միանգամից, բայց տարբեր լեզուներով ընթերցողի ուշադրությանն են հանձնում ԱԺ պատգամավոր Կարեն Վարդանյանի «Սովյալ գյուղը չի կարող երկիր կերակրել» հոդվածը:
«Կապիտալը» շարունակում է իր լավ ավանդույթը` անդրադառնալ կառավարության առաջիկա նիստի օրակարգային հարցերին. «Հայագիտությունը` որպես գերակայություն. կառավարությունն ըստ էության վերջնականապես չի կողմնորոշվել գիտության գերակայությունների հարցում», «Հայոց աշխարհի» Կիմա Եղիազարյանը մատնանշում է տերով (Հրանտ Մաթևոսյան) և անտեր (Արամ Մանուկյան, Հովհաննես Թումանյան, Դանիել Վարուժան) հոբելյարների հանդեպ կառավարության ցուցաբերած վերաբերմունքը, իսկ «Նովոյե վրեմյան» հայատառ թերթին անգամ պատիվ բերող սկզբունքայնությամբ պայքարում է, որպեսզի այլ լեզվի սովոր իր ականջի համար խորթ և անընկալելի «Արբուն» բառը հանկարծ քաղաքացիություն չստանա: Այսօր այս թերթը դիմել է ռուսական «Իզվեստիայի» օգնությանը` այնտեղից արտատպելով «Ինչպես հայկական կոնյակը դարձնել արբուն» հոդվածի շարադրանքը և հավելելով, որ «Արբուն» անվամբ բնակավայր կա Ուդմուրտիայում, ինչը նույնպես կարող է թյուրիմացության տեղիք տալ:
