շաբաթ, 29 մայիսի 2010
Քչախոս մամուլի սլաքները...
Հետտոնական օրը հրապարակվել են «Հայաստանի Հանրապետությունը», «Հայ զինվորը», «Առավոտը» և «168 ժամը»: Վերջինս նախ հայտարարել է, թե իշխանության կուլիսներում գնալով ավելի է թեժանում «յուրայինների հստակեցման և հավաքագրման համար մղվող պայքարը», ՀՀ նախագահի ու Աժ խոսնակի միջև «այլևս խոր անդունդ կա» և այլն, ապա չի բացառել, որ դրանք կարող են նաև լինել «խոսակցություն-ենթադրություններ»` իշխանությունների «նախօրոք գծված սցենարով»: Մի այլ հրապարակման մեջ թերթն անդրադարձել է «բիզնես պայմանների բարելավման ուղղությամբ» կառավարության ձեռնարկումներին, դրանք համարել դրական քայլ` «լավ սկիզբ», որը սակայն, թերթի բնութագրմամբ, «գլխացավանքի կեսն է»:
«Առավոտը» տեղեկացրել է Կապանի նախկին լեռնահարստացման կոմբինատի հանրակացարանի «վտարվող, բայց տակավին ապրող» բնակիչների անմխիթար վիճակի մասին ու եզրակացրել, թե սեփականաշնորհման ժամանակ նրանց մոռացել են կամ «մոռացել»: Մի այլ հրապարակման մեջ թերթը «դիմել է» ՀՀ վարչապետ Տիգրան Սարգսյանին իր բլոգում տեղադրված մի հարցադրման կապակցությամբ և, նկատի առնելով «Սինգապուրի փորձը», առաջարկել լուծման տարբերակ այն հարցին, թե «ինչպես դառնալ զարգացած երկիր»:
