երեքշաբթի, 1 հունիսի 2010
Մեր բազմազբաղ գործիչները
«Ազգը» և «Առավոտը» միաբերան տեղեկացնում են, որ Խորվաթիայի նախագահի հրավերով այդ երկիր է այցելել ԲՀԿ նախագահ Գագիկ Ծառուկյանը: «Առավել քան կարևորվել է համագործակցությունը երկու երկրների գործարարների միջև»,-նշում են թերթերը և հավելում, որ «Խորվաթիայի նախագահը կարևորել է հայ-խորվաթական հարաբերությունների զարգացման գործում Գագիկ Ծառուկյանի նշանակալի ավանդը»:
«Գոլոս Արմենիին» Մարինա Մկրտչյանի «Արթուր Բաղդասարյանը դարձյալ ընկղմվում էր ամբոխահաճության ճահճուտը» հոդվածով անդրադառնում է ՕԵԿ առաջնորդի վերջին ժամանակների գործունեությանը, որն առավել ցայտուն է արտահայտվել հեռուստաընկերություններից մեկում ունեցած նրա ելույթում: Ըստ թերթի, «ամբոխահաճությունն անբուժելի հիվանդություն է», և Արթուր Բաղդասարյանի ելույթը «դրա ապացույցն է»:Հոդվածագրի դիտարկմամբ կուսակցապետը խոսել է շատ ու շատ հարցերի մասին, բայց չի հիշատակել տեղեկատվության ոլորտը, որտեղ, շատերի գնահատմամբ, Հայաստանը տանուլ է տալիս:
ՀՀ կառավարության թարմացված և նոր կայքերի բացմանը նվիրված Դավիթ Սարգսյանի մամուլի ասուլիսը երեկ հանգամանորեն լուսաբանել են էլեկտրոնային լրատվամիջոցները, իսկ այսօր` «Հայաստանի Հանրապետությունը» («Հասարակություն-կառավարություն շփումները` ավելի թափանցիկ»), «Կապիտալը» («Կառավարությունը որոշել է ավելի թափանցիկ դառնալ. լրատվամիջոցները նոր մրցակից կունենան»):
«Հայոց աշխարհն» արձանագրում է, որ «Բյուջեի եկամուտներն առաջ են ընկել ծախսերից», իսկ «Իրավունքը», լուսաբանելով ՀՀ վերահսկիչ պալատի 2009թ. հաշվետվության քննարկումը Ազգային ժողովում, հարցնում է` «Պետությունը չի՞ ուզում բյուջեն թալանողներին պատժել»:
«168 ժամի» Բաբկեն Թունյանը դիտարկում է «Կարծելու և կանխատեսելու աննշմարելի սահմանը» և մի շարք օրինակներով հանգում այն եզրակացության, որ ԱԺ պատգամավոր Գագիկ Մինասյանի «կանխատեսումները երբեք իրականություն չեն դարձել»:
