շաբաթ, 5 հունիսի 2010
ԿԲ նախկին նախագահի ներկա մտահոգությունները
ՀՀ ԿԲ նախկին նախագահ Բ.Ասատրյանի` Հայաստանում վերջին ամիսներին արձանագրված տնտեսական աճի և Կենտրոնական բանկի վարած քաղաքականության վերաբերյալ գնահատականները լրատվամիջոցները ներկայացրել են ուշագրավ վերնագրերով. «Ուրիշի հաշվին լավ ենք ապրում» («Հայք»), «Կառավարությունը մի լեզվով է խոսում, տնտեսությունը մի այլ լեզվով է ընթանում» («Առավոտ»), «Օլիգարխներն ուղղակի խժռում են փոքր ու միջին բիզնեսը» և «Առաջիկայում լինելու են դժվարություններ» («168 ժամ»): «Կապիտալը» հատկապես ընդգծել է ԿԲ նախկին նախագահի մտահոգությունները. «իշխանությունները պետք է խիստ անհանգստանան արտաքին պարտքից», «Սպառողական գների բարձրացման հիմնական բեռն ընկել է պարենային ապրանքների վրա», «Հյուսիսային պողոտան ամբողջովին կառուցվել է «կեղտոտ» փողերով», «մեր տնտեսությունն ամբողջովին մոնոպոլիզացված է» և այլն: Մի այլ հրապարակման մեջ թերթն անդրադարձել է «Հարավկովկասյան երկաթուղի» ընկերության` մի քանի երկաթուղային կայարանների փակման վերաբերյալ որոշմանը և նշել, որ «կառավարությունը ռուսական կոնցեսիոներից պահանջում է չեղյալ համարել որոշումը»:
«Հայոց աշխարհը» դիտարկել է տնտեսական աճի և հարկային եկամուտների հիմնախնդիրները, նշել, թե չնայած առաջին հայացքից տարօրինակ է, որ «հարկային եկամուտների հավաքման տեմպը» գերազանցում է տնտեսությանը, սակայն իրականում կան օբյեկտիվ պատճառներ», ապա փորձել բացահայտել դրանք:
