Հայաստանի Հանրապետության Կառավարություն

Ավելի շատ մեկնաբանվում են 2010թ. հինգ ամսվա արդյունքները. «Տնտեսական ցուցանիշները գերազանցում են ակնկալիքները. արդյունաբերության արտադրանքի ծավալը աճել է 12.1 տոկոսով» («Հայաստանի Հանրապետություն»), «Տնտեսական աճը շարունակվում է. հինգ ամսում այն հասավ 8.8 տոկոսի» («Հայոց աշխարհ»), «Հայաստանի տնտեսական աճը հասավ 8.8 տոկոսի» («Ազգ»), «Աճում ենք ու աճում» («Առավոտ»), «Հունվար-մայիսին` 8.8 տոկոս աճ. աճել է նույնիսկ շինարարությունը» («Կապիտալ»): Ի տարբերություն վերը նշված թերթերի «Ժամանակը» «մի փոքր ավելի խորն է դիտարկում ստացված թվերը», ինչի շնորհիվ պարզ է դառնում, «որ այդ աճը միայն թղթի վրա է»: Պարզվում է, որ մայիսին ստացված թվերը պետք է համեմատել ոչ թե 2009-ի, «այլ նախորդ ամսվա հետ» և կստացվի, որ արդյունաբերության ոլորտւմ արձանագրվել է 6.3 տոկոս...նվազում: Այս եղանակով ավելի ու ավելի բացահայտելով խնդրի էությունը, հոդվածագիրը սույն պատեհ առիթով հիշեցնում է Ա.Վարուդակիսի արտահայտած այն միտքը, «թե Հայաստանում ստվերային տնտեսությունը 35-40 տոկոս է» և հանգում հետևյալ եզրակացության. «Եթե ՀԲ ներկայացուցիչն է այդպիսի բան ասում, նշանակում է ստվերը մեր երկրում անհամեմատ մեծ է»: Այս նույն առնչությամբ «Իրավունքի» Քերոբ Սարգսյանին մտատանջում է, թե «Ինչո՞ւ ՀԲ ներկայացուցիչը հիշեց ահռելի ստվերը»: Զերծ մնալով «ենթադրություններով ավելի հեռուն» գնալուց, հոդվածագիրը հույսը դնում է կոնկրետ փաստերի վրա, որոնք նրա կարծիքով «ամենամոտ ապագայում ի հայտ կգան»: Սկսելով «էլ ավելի օլիգարխիկ» վերնագրված հոդվածը, որը տեղ է գտել «Ստի վրա բռնացրել ենք» խորագրի ներքո, «Հայկական ժամանակի» Հայկ Գևորգյանը ընդունում է, որ «այս տարի փող, իրոք, շատ է հավաքվում, քան անցյալ տարի»: Բայց «փող էլ կա` փող էլ», նկատում է նա և մանրակրկիտ վերլուծության արդյունքում եզրակացնում, որ «բյուջեի համալրումն իրականացվում է ավելի փոքր բիզնեսի հաշվին»: Եվ վերջում` «տնտեսության օլիգարխացումը ու ֆեոդալականացումը խորանում է»:
Մամուլի ուշադրությունից չի վրիպել ՀՀ աշխատանքի և սոցիալական հարցերի նախարարի աշխատանքից ազատվելու դիմումը. «Հրաժարական է տվել» («Ժամանակ»), «ԲՀԿ-ն` կադրային խնդիրների առաջ» («168 ժամ»), «Հրաժարական է տվել աշխատանքի և սոցիալական հարցերի նախարարը» («Նովոյե վրեմյա»): «Առավոտի» թղթակիցը Մխիթար Մնացականյանի հետ վերջին անգամ շփվել է անցած շաբաթ Գավառում, երբ նա դեռ նախարար էր և մասնակցում էր «Աշխատանքի տոնավաճառին»: Ներկայացնելով նրան ուղղված «խրթին» հարցերի մի մասը, հոդվածագիրը եզրակացնում է, որ նման տոնավաճառները դժվար թե լուծեն զբաղվածության հարցը, քանի որ մարզի պաշտոնական տվյալներով 8 հազար գործազուրկներին առաջարկվում է ընդամենը 10 տոկոս աշխատատեղ: