Հայաստանի Հանրապետության Կառավարություն

«Հակաճգնաժամային ծրագրերը հնարավորություն տվեցին նվազեցնելու ճգնաժամի բացասական հետևանքները»,- «Դե ֆակտո իրավունքը»-ին ասել է Գագիկ Մինասյանը և թղթակցի բազմաթիվ հարցերին պատասխանելու ընթացքում հիմնավորել իր տեսակետը: ԱԺ պատգամավորը նույնքան հաստատակամ է իր ֆուտբոլային նախասիրությամբ` «Բրազիլիա, Բրազիլիա, Բրազիլիա»:
ՀՀ ԱՎԾ հրապարակած ցուցանիշները «Իրավունքի» Քերոբ Սարգսյանին կրկին հիշեցրել են ոչ վաղ անցյալը` երկնիշ աճի «երազելի տարիները»: Հոդվածագիրը, չնայած վիճակագրական հնգամսյա ցուցանիշների արտաքին փայլին», դրանց հիմքում «մի շարք խութեր է» նկատում: Շինարարության վերականգնումը, հանքահումքային ճյուղի որոշիչ դերի պահպանումը արդյունաբերության ընդհանուր կառուցվածքում նմանվում է «արդեն իսկ տեսած սխալը կրկնելուն»:
«Պետական տուրքի մասին» օրենքի կառավարության առաջարկած փոփոխությունը «Առավոտի» Նելլի Բաբայանին ենթադրել է տալիս, որ «չենջերի» ու գրավատների «հերն անիծվելու է», բայց, Արա Նռանյանի կանխատեսմամբ` 2011թ. հունվարի 1-ից, քանի որ նախագիծը քննարկվելու է աշնանը:
Հանգամանորեն լուսաբանվում է «Միգրացիայի, դրամական փոխանցումների և սփյուռքի տնտեսական ու սոցիալական ազդեցության հարցեր» միջազգային համաժողովի աշխատանքը. «Սփյուռքը և միգրացիան` տնտեսական զարգացման միջոց» («Հայաստանի Հանրապետություն»), «Ինչպես ծախսել դրսից ստացած փողերը. կառավարությունն առաջարկում է ներդրումներ կատարել» («Կապիտալ»): Մեծ է եղել «Հայկական ժամանակի» ուրախությունը, երբ «գործող կառավարությունում վերջապես գտնվել են մարդիկ, ովքեր սկսել են բարձրաձայնել մասնավոր տրանսֆերտների» բացասական դերը: Չնայած դա «դժվար թե ազդեցություն ունենա մեր տնտեսության վրա»:
Իսկ «Հայքը» բացատրում է, թե «ինչ է ցանկանում անել վարչախումբը տրանսֆերտների հետ», որի «պարագլուխները չեն կարող հանգիստ քնել, երբ նրանց կողքով գալիս, անցնում են այդ գումարները»: Թերթի կարծիքով նրանք ցանկանում են աշխատել «50-50» տարբերակով, ճիշտ այնպես, ինչպես «գրպանում են» տաքսու վարորդին մեր տված հարյուր դրամի կեսը: