երեքշաբթի, 20 հուլիսի 2010
Մարտահրավերներին ընդառաջ
«Կապիտալի» հրապարակումներից մեկն անդրադարձել է Սոչի քաղաքում (ՌԴ) ընթացող օլիմպիական կառույցների շինարարությանը հայկական շինանյութերի, մասնավորապես ցեմենտի մատակարարման հնարավորությանը և նշել, որ չնայած գազի թանկացումը խափանել է հայ արտադրողների ծրագրերը, այդուհանդերձ ՀՀ կառավարությունը «չի կորցնում հույսը», որ խոշորածավալ շինությունների կառուցման համար կմատակարարվի շինանյութ: Մի այլ հոդվածում թերթը միջազգային շուկայում ցորենի գնի բարձրացումը համարում է Հայաստանի սպառողական շուկայի համար ոչ ցանկալի իրողություն և հույս հայտնել, որ ՀՀ ՏՄՊՊ հանձնաժողովը համապատասխան քայլեր կձեռնարկի` կանխելու ներքին շուկայում գների չհիմնավորված բարձրացումը:
«Գոլոս Արմենիին» նշել է, որ հայկական կոնյակի ապրանքային անվան փոփոխությունը («Արբուն») Հայաստանի ստանձնած միջազգային պարտավորություններից մեկն էր, ինչը և կատարել է կառավարությունը, նաև հավելել հեղինակի որոշ նկատառումները:
«Հայկական ժամանակը» կարծիք է հայտնել, որ փոխարժեքի «տատանումներն ավելի կտրուկ են դարձել», քան նույնիսկ «անցած` ճգնաժամային տարում», ինչը ուղղակի հարվածում է «հայաստանցիների մի մեծ հատվածի գրպանին»: «Առավոտը» հիշատակել է «Հազարամյակի մարտահրավերներ հիմնադրամ-Հայաստան» ՊՈԱԿ-ի աշխատանքներին ծանոթանալու նպատակով Արմավիրի մարզպետի Վաղարշապատի տարածաշրջան այցը, կատարված աշխատանքների արդյունքից դժգոհությունը, ապա փոխանցել է «ՀՄՀ-Հայաստան» ՊՈԱԿ-ի արձագանքը, թե կազմակերպությունը «Արմավիրի մարզպետարանից պաշտոնական գրություն չի ստացել «մարզպետի ունեցած դժգոհությունների մասին», թեև ՊՈԱԿ-ի ոռոգման ծրագրի ղեկավար Տ.Քալանթարյանի հետ հեռախոսազրույցում մարզի ղեկավարը «բարձրացրել է երկու հարց»: Նույն «Առավոտը», «Հայկական ժամանակը» նաև «Հայոց աշխարհը» տեղեկացրել են, որ Գեղարքունիքի մարզի 6 համայնքների մի քանի տասնյակ բնակիչներ նստացույց են արել և փակել Երևան-Մարտունի մայրուղին, ինչի պատճառը եղել է Սևանա լիճը սնուցող Արգիճի գետի վրա հիդրոէլեկտրակայանի կառուցման անօրինական աշխատանքների վերսկսումը:
