հինգշաբթի, 22 հուլիսի 2010
Մամուլը և վիճակագրությունը
Մի քանի լրատվամիջոցներ անդրադարձել են առաջին կիսամյակում գրանցված տնտեսական աճի վերաբերյալ ԱՎԾ հրապարակած տվյալներին: «168 ժամը» գրել է, թե չնայած ԲՀԿ-ական խորհրդարանական Վարդան Բոստանջյանը սխալ է համարում կարճաժամկետ կտրվածքով գնահատականներ տալը, այդուհանդերձ, «յուրաքանչյուր ամսվա 20-ից հետո» «իշխանամետ գործիչները» տնտեսական վիճակը ներկայացնում են, «ինչպես միշտ, դրական երանգներով», ապա հավելել նախկին վարչապետ Հրանտ Բագրատյանի մի արտահայտությունը, թե «իշխանություններն այս տարվա համար այնպիսի երկնիշ աճ կնկարեն, որ անգամ Ռոբերտ Քոչարյանն իրեն վատ կզգա»: «Հայկական ժամանակի» Հայկ Գևորգյանը փորձել է հակասություններ գտնել ներկայացված տվյալների մեջ, մասնավորապես վիճակագիրների «թիվ նկարելը» համարել «ոչ թե պարզ խաբեություն, այլ արդեն ամոթ»: Մի այլ հրապարակման մեջ թերթը ներկայացրել է Արտակարգ իրավիճակների նախարարի հետ հարցազրույցը:
«Հայոց աշխարհը» փոխանցել է կիսամյակի տնտեսական աճի վերաբերյալ ԱԺ ֆինանսավարկային, բյուջետային հարցերի հանձնաժողովի նախագահ Գագիկ Մինասյանի մեկնաբանությունը, թե հրապարակված մակրոտնտեսական ցուցանիշները վկայում են, որ «կառավարության հակաճգնաժամային ծրագիրը տալիս է իր պտուղները»:
Նույն «168 ժամը» մեր օրերում կենսաթոշակային բարեփոխումների թեման համարել է «ամենահետաքրքիրը», իսկ կենսաթոշակային մասնավոր հիմնադրամը` «ամենավիճահարույցը», մանավանդ որ այդ հիմնադրամներում ներգրավվելիք գումարի 50 տոկոսը նախատեսվում է պահել արտասահմանում` արժեթղթերի տեսքով: «Կապիտալը» ներկայացրել է ԱԺ պատգամավոր Գ. Մինասյանի հակառակ կարծիքը` «կենսաթոշակային ֆոնդի մի մասը Հայաստանից հանելն ավելի ապահով է»:
«Առավոտը» դարձյալ «վերադարձել է» օտարալեզու դպրոցների թեմային և եզրակացրել , թե «օտարալեզու դպրոցներ հիմնելու նախաձեռնությունն ընդամենը Հայաստանի կառավարության նահանջն է ռուսական լոբինգի առջև»:
