շաբաթ, 24 հուլիսի 2010
Կանխատեսումների դժվարին ճանապարհը
«Հայաստանի Հանրապետությունը» ՀՀ կառավարության և ՀԲ-ի կողմից գյուղական ճանապարհների վերականգնման ծրագրի վավերացումը որակել է «ի նպաստ գյուղական համայնքների զարգացման»: «Կապիտալը» նախ նշել է համաձայնագրում նախանշված պայմանների դրական կողմերը, ապա գրել, որ Ֆինանսների նախարար Տիգրան Դավթյանը չի բացառել 2010թ. բյուջեի վերանայման տարբերակը, թեև «կառավարությունը դեռ չգիտի ինչպես ծախսել» առաջին կիսամյակի արդյունքներով հավաքագրված հարկային «լրացուցիչ եկամուտը»: Թերթն իր այլ հրապարակումներում նշել է նաև, որ ըստ Եվրոբանկի գնահատումների` «Հայաստանում կանխատեսվում է ՀՆԱ-ի 8% աճ` նախկին 10%-ի փոխարեն», և բանկային համակարգի ակտիվներով հինգ խոշոր բանկեր կանխատեսում են դրամի արժեզրկում դոլարի նկատմամբ:
«Առավոտը» «Պետական տուրքի մասին» օրենքում փոփոխութոյւններ և լրացումներ կատարելու մասին կառավարության նախագծի առիթով նախ գրել է, թե այն նախատեսում է արտարժույթի փոխանակման կետերի ու գրավատների պետտուրքերի դրույքաչափերը աստղաբաշխական թվերի հասցնել, ապա նշել, թե «մասնագետների կարծիքով դրանից կշահեն բանկերը»: «Կապիտալը», անդրադառնալով ԿԲ նախկին նախագահ Բագրատ Ասատրյանի նախօրեի հայտարարությանը, թե «առանց վարկային կազմակերպությունների հետ քննարկելու շրջանառության մեջ է դրվել» վերոհիշյալ նախագիծը, հրապարակել է ԿԲ հասարակայնության հետ կապերի ծառայության ղեկավար Զարուհի Բարսեղյանի պնդումը, որ բոլոր վարկյաին կազմակերպությունները այն «առաջին անգամ ստացել են դեռ 9 ամիս առաջ»:
«Հայոց աշխարհը» իր երկու հրապարակումներում համապատասխանաբար գրել է, որ «տնտեսական աճը սեղմվում է», «բանկերի շահույթները կրճատվել են» շահութահարկերը` ավելացել:
