Հայաստանի Հանրապետության Կառավարություն

ՀՀ ԱՎԾ հրապարակած առաջին կիսամյակի արդյունքները «Հայկական ժամանակը» բնութագրում է «Քանակ՝ որակի փոխարեն» վերնագրի ներքո. «...տեղի է ունեցել ընդամենը քանակական աճ, ինչն ամենևին էլ ոգևորության տեղիք չպետք է տա»։ «Ժամանակն» էլ է զարմացած. «Եթե տնտեսությունն աճում է, ինչո՞ւ է գազի սպառումը նվազում 20 տոկոսով»։ Կիսամյակի տվյալներն ավելի հանգամանորեն է վերլուծում «Իրավունքի» Քերոբ Սարգսյանը։ Սակայն նա նույնպես ամեն բան հալած յուղի տեղ չի ընդունում՝ իր հերթին փորձելով պարզել, թե «Ի՞նչ կա գեղեցիկ թվերից այն կողմ»։ «Կապիտալի» հարցերին պատասխանող տնտեսագիտության դոկտոր Հեղինե Մանուկյանը նշում է, որ «այս տարի աճ ապահովելը մեծ խնդիր չէ, քանի որ նախորդ տարի անկումը շատ խորն էր, 4-5 կամ նույնիսկ 7-8 տոկոս աճ ապահովելը մեծ դժվարություն չէ և չի նշանակում, թե մենք տնտեսության նախաճգնաժամային մասշտաբներին ենք հասնում»։ Մեկ այլ նյութում «Կապիտալն» իրոք փոխանցում է, որ «ԿԲ-ն ավելի լավատես է դարձել, նախկին 3-4-ի փոխարեն այժմ ակնկալվում է 5-6 տոկոս տնտեսական աճ»։ Այս թերթը շարունակում է մտահոգվել, թե «Ինչո՞ւ չէժանացավ շաքարավազը», երբ «համաշխարհային շուկայում վերջին յոթ ամսվա ընթացքում գները նվազել են 37,8 տոկոսով», չնայած շատ լավ գիտե, որ «հայկական շուկայի մենատերը՝ «Ալեքս Գրիգը», այդ բանը չի տեսնում» և առաջիկայում էլ չի տեսնելու։
Մասնակցելով Հայաստանի ազգային մրցունակության հիմնադրամի կազմակերպած ուղևորությանը Հալիձոր, «Առավոտի» Լուսինե Խաչատրյանը փոխանցում է այդ գյուղի բնակիչների «մեռած կյանքի» պատկերը. «գազ, ոռոգման ջուր չկա, խմելու ջուրը դույլերով, բիդոններով լցնում ենք, 2-3 օր պահում, օգտագործում»։ Պարզվում է՝ հալիձորցիները ճոպանուղու հետ էլ հույս չեն կապում, և ընդհանրապես թերթը շատ է համարում Հալիձոր-Տաթև ճանապարհի վերանորոգման նպատակով կառավարության հատկացրած 500 մլն դրամը։