Հայաստանի Հանրապետության Կառավարություն

«Ես իմ դժգոհությունն եմ արտահայտում այդ թանկացումների նկատմամբ», «Որքան էլ տնտեսությունն անվանենք ազատական, բայց ազատական չի նշանակում անտերություն», «Կարծում եմ, որ ժողովուրդն ավելի արտագաղթի է հակված, քան սոցիալական բունտի»,- այս մտքերի հեղինակը Վարդան Բոստանջյանն է, որը պատասխանել է «Ժամանակի» հարցերին: Թղթակիցը «տարօրինակ» է համարում «իշխանական թևի պատգամավորից» նման խոսքեր լսելը, ինչին ի պատասխան ԱԺ պատգամավորը պարզաբանել է. «Սա քննադատություն չէ, սա հոգացավություն է: Միգուցե ես իմ դեգերումներում մի փոքր հեռու եմ գնում, բայց հեռու գնալ, մոտ մնալ` որևէ նշանակություն չունի: Ես չեմ ուզում որևէ մեկին վատաբանել, ես մտածում եմ»:
Լրագրողներին մտածելու և արտահայտվելու առիթ է տվել կադաստրի պետկոմիտեի նախագահի տեղակալը, որին երեկվա ճեպազրույցի ժամանակ տրված «խաչաձև» հարցերը ստիպել են հաստատել, որ «Մանուկ Վարդանյանի կադաստրից հեռանալուց հետո կաշառքն այնտեղ վերացել է» («Առավոտ») և «Այսինքն կոռուպցիան հիմա կադաստրում վերացվա՞ծ է» հարցին Աշոտ Մուսայանը պատասխանել է. «Այո, ներկայումս վերացված է» («Հայկական ժամանակ»): «Ժամանակն» իր հերթին կոռուպցիայի ազգային «առանձ¬նահատկությունների» մասին զրուցել է սոցիոլոգ Բագրատ Հարությունյանի հետ:
Խոշոր հարկատուների ցանկի վերլուծությունից «Առավոտի» Հռիփսիմե Ջեբեջյանին պարզ է դարձել, որ մեր «ազգային արժեքները» պարտքի տակ խրված են: Նրա հաշվարկով «Տոյոտա Երևանը» չնչին հարկեր է վճարել, մինչդեռ «ծառայողական մեքենա գնելիս բոլոր պետական կառույցները նախապատվությունը տալիս են «Տոյոտային» (այս բիզնեսով, ըստ թերթի, զբաղվում է Ռոբերտ Քոչարյանի որդին` Սեդրակը-Կ.): Միայն ՀՀ ոստիկանության ձեռք բերած 70 մեքենաների գործարքի արդյունքում «մի քանի օրում պետբյուջեից Քոչարյանների ընտանեկան բյուջե մտավ 545 մլն 250 հազար դրամ»: Հոդվածագիրը հիշեցնում է նաև գոմեշի մսի ներկրման առիթով անցյալ տարի վարչապետ Տիգրան Սարգսյանի հրապարակած փաստերը: Հարցը կառավարության երեկվա նիստի օրակարգից հանելու առիթով թեման արծարծում են նաև «Հայկական ժամանակը», «Ժամանակը» («Կառավարությունը 37 րոպեում 44 որոշում է ընդունում, այնինչ...») և այլ լրատվամիջոցներ:
«ՀԺ»-ն թվարկում է երեկ թանկացած երկու հացատեսակ ևս, իսկ ՀՀ պարենի և մթերումների նախկին նախարար Դավիթ Զադոյանը «Առավոտին» ասում է, որ «առաջիկայում հացը ավելի է թանկանալու», և «հացի գնի վերահսկման ամենաարդյունավետ մեխանիզմը» ժողովրդի բողոքի ձայնն է:
Կառավարության երեկվա նիստից «ՀԺ»-ի ուշադրությանն արժանացել է նաև արտասահմանյան պատվիրակությունների ընդունելության համար նախատեսված գումարի ավելացման որոշումը: «Դրա պատճառը մեկն է` ՀԱՊԿ ոչ պաշտոնական գագաթնաժողովը»,-կարծիք է հայտնում հոդվածագիրը` միանգամայն ավելորդ շքեղություն համարելով զբոսանավի ձեռքբերումը: Րաֆֆի Կ.Հովհաննիսյանն էլ «Առավոտում» տպագրված իր «Յո՞ երթաս, ՀԱՊԿ» հոդվածում այն միտքն է արտահայտում, որ եթե Ռուսաստանը իսկապես զինի Ադրբեջանի «ագրեսիվ, ռազմատենչ և ռևիզիոնիստ» վարչախմբին, ապա «Հայաստանը պետք է անհապաղ դուրս գա ՀԱՊԿ-ից»:
«Առավոտի» ֆոտոխցիկը որսացել էր վարչապետ Տիգրան Սարգսյանի աշխատասենյակում սկսված «վերանորոգման ատրիբուտները», երբ աշխատակիցները «արագորեն» փակել են պատուհանները: Իսկ ահա «ՀԺ»-ն, պատմելով ԱԺ նիստերի դահլիճի նորոգման ընթացքի մասին, կասկած է հայտնում, թե դահլիճի նոր տեսքը «կնպաստի, որ մեր մականունավոր պատգամավորները սկսեն օրենքներ գրել»:
Փոխանցելով Հրանտ Բագրատյանի զարմանքը, թե ինչպես կարելի է «ռուսական պետական ընկերությանը» արտոնել կառավարության բակում շենք կառուցել, «Իրավունքը» հակադարձում է, թե երբ նախկին վարչապետն ամերիկացիներին էր տալիս «կոմսոմոլի կենտկոմի նախկին շենքը», ապա այդքան նրբազգացություն չէր դրսևորում: Մինչդեռ «ոչ մի օտարի չի կարելի թողնել «բնավորվել» այնպիսի վայրում, որի տակ ռազմավարական օբյեկտ կա»: