շաբաթ, 14 օգոստոսի 2010
Ստվերի խաղը
Դաշնակցական պատգամավոր Արծվիկ Մինասյանի կարծիքով մեր երկրում «սեփականության իրավունքը կենտրոնացել է մի խումբ անձանց ձեռքին»։ Այս համոզմունքն ավելի է ամրապնդել ՀՀ սահմանադրական դատարանի ս.թ. հուլիսի 13-ին արձակված վճիռը, ըստ որի «բաժնետիրական ընկերությունը իրավունք ունի իրականացնել բաժնետոմսերի համախմբում՝ կոնսոլիդացիա»։ «Առավոտի» փոխանցմամբ ՍԴ որոշումը փաստորեն «բաժնետիրոջը զրկում է իր իսկ բաժնետոմսերը տնօրինելու իրավունքից»։ Ավելին, Արծվիկ Մինասյանի խոսքով «բաժնետոմսերի հետ կապված այս ամբողջ խաղը հատկապես իրականացվում է այն օլիգարխների և այն սեփականատերերի կողմից, որոնք ցանկանում են իրենց ձեռքը վերցնել այս կամ այն ընկերության ամբողջական վերահսկողությունը, և ոչ միայն պարզապես կառավարման, այլ ավելի շատ դեպի ստվեր տեղափոխվելու նպատակով»։ Պատգամավորն ասում է, որ «ՍԴ այս որոշումը փաստորեն օրինականացնում է օլիգարխների՝ ամեն ինչ իրենցով անելու վարքագիծը», որ «ՍԴ-ն թույլ է տվել կոպտագույն խախտում և սխալ, որի արդյունքում սեփականության իրավունքի պաշտպանության համակարգը էականորեն տուժել է, տուժելու է նաև ներդրումային միջավայրը»։
Նույն թերթի մեկ այլ հոդվածի վերնագիր է դարձել ԿԳ նախարարությունում տարածված հետևյալ «թևավոր խոսքը»՝ «Աշոտյանը և իր վկաները»։ Քննադատվում է նախարարի վարած կադրային քաղաքականությունը. «վարչության պետի տեղակալների հաստիքները հիմնականում զբաղեցնում են» նրա մտերիմները՝ հետագայում պետ դառնալու ակնկալիքով։ Պակասելու փոխարեն հաստիքներն ավելանալու փաստը նախարարության պաշտոնյաները բացատրում են «կառուցվածքային փոփոխություններով», որոնք «բխել են ՀՀ վարչապետի հանձնարարականից»։ Եվ այլն։
