Հայաստանի Հանրապետության Կառավարություն

«Խորհրդավոր բաներ են կատարվում Հայաստանում»,-խորհրդավոր եղանակով նկատում է «Հայկական ժամանակը» և զարմանում, թե ինչու Հայաստանի և Վրաստանի մթերքները, խախտելով հաղորդակից անոթների օրենքը, ըստ անհրաժեշտության չեն հայտնվում հարևան երկրներում. Վրաստանի երկու անգամ էժան կարտոֆիլը՝ Հայաստանում և Հայաստանի նույնքան էժան հավկիթը՝ Վրաստանում։
Մամուլն ինչպես երեկ, այնպես էլ այսօր անդրադարձել է կառավարության նիստի ընդունած որոշումներին։ Առավել մեծ ուշադրության են արժանացել «գոմեշի մսի» («ՀԺ», «Հայոց աշխարհ», «Ժամանակ», «Առավոտ»-«Հիմա էլ գոմեշի ներկրո՞ւմը մոնոպոլիա կդարձնեն. մսի ներկրումը վտանգավոր է, քանի դեռ տգետ կադրեր կան»), «Մաքուր հայրենիք» ծրագրի («ՀԺ», «Ազգ»), ավտոմեքենաների կայանատեղիների («Առավոտ») և մի քանի այլ օրենսդրական նախաձեռնությունների («Ժամանակ»), Շիրակի մարզում կազմակերպվող բացօթյա համերգների («Առավոտ») թեմաները։
«Ղումարբազություն»՝ պետական մակարդակով. թե ինչու չեն գիտակցում, որ «ղումար» խաղալը շատ վատ բան է» հոդվածում «Առավոտն» արձանագրում է տարատեսակ խաղային միջոցների թվի ավելացումը և եզրակացնում, որ «ղումարբազությունը» մեր երկրում ոչ միայն խոչընդոտների չի հանդիպում, այլև դեռ մի բան էլ խրախուսվում է»։ Գրեթե նույն կարծիքին է «Հայոց աշխարհը՝ «Վիճակախաղերը պիտի պետական լինեն», քանի որ այդ «բիզնեսը կենտրոնացած է մասնավոր ձեռքերում, իսկ պետությանը բաժին են ընկնում միայն գրոշներ»։
«Դելովոյ էքսպրեսն» արծարծում է սննդամթերքի անվտանգության թեման և առաջարկում ՓՄՁ աջակցությանը հատկացվող գումարի մի մասը տրամադրել սննդամթերքի անվտանգության ապահովմանը։
«Իրավունքը» զրուցել է ԱՄՀ մշտական ներկայացուցիչ Գիերմո Տոլոսայի հետ, ով դրական է գնահատում Հայաստանի տնտեսության մեջ ստեղծված վիճակը և համոզմունք հայտնում, որ «ճգնաժամի երկրորդ ալիք չի արձանագրվի»։