Հայաստանի Հանրապետության Կառավարություն

Ազգային մրցունակության հիմնադրամի նախագահի, հյուրանոցների միության փոխնախագահի, ներգնա տուրօպերատորների միության նախագահի երեկվա համատեղ մամուլի ասուլիսը ոչ միայն բազմակարծության օրինակ է եղել, այլև աչքի է ընկել լրատվամիջոցների տարբեր ընկալմամբ։ Սա երևում է նաև հրապարակումների վերնագրերից։ Արմենպրեսն այն տպավորությունն է ստացել, որ «Ներգնա զբոսաշրջությունը զարգանալու միտումներ ունի. ՀՀ զբոսաշրջության բնագավառում 2010թ. 12 տոկոս աճ է գրանցվել 2009թ. համեմատ» («Հայաստանի Հանրապետություն»)։ «Կապիտալի» ընկալումը գրեթե համանման է՝ «12 տոկոս աճ զբոսաշրջության ոլորտում, բայց հյուրանոցները դա չեն զգացել»։ Իսկ ահա «Առավոտը» փոխանցում է միանգամայն հակառակ կարծիք. «Սուտ է, թե Հայաստանում տուրիզմը զարգանում է»։ Այս մտքի հեղինակը տուրօպերատորների միության նախագահն է. «Մարզերում վիճակն ավելի վատ է, հիմա էլ Տաթև-ճոպանուղի են խաղացնում, բայց մենակ ճոպանուղով զբոսաշրջություն չեն զարգացնի»,-ասում է նա։
«Կապիտալը» հայտնում է, որ ՏՄՊՊՀ-ն տեղեկատվություն է պահանջում «Ալեքս Գրիգից», քանի որ արձանագրվել են ձեթի իրացման գների փոփոխություններ։ Այս իրողությունից «Ժամանակը» երկու հետևություն է արել. «Այնպիսի տպավորություն է, որ Լֆիկ Սամոն հաճույք է ստանում օրենքները խախտելուց և տուգանվելուց։ Կամ էլ ՏՄՊՊՀ-ի և Լֆիկ Սամոյի միջև պարզապես խաղ է ընթանում, որպեսզի տպավորություն ստեղծվի, թե երկրում ազատ մրցակցություն կա, կամ պետական մարմինները զբաղմունք ունեն»։ Նույն թերթը մեկ այլ ապրանքի՝ օղու կեղծման օրինակով ցույց է տալիս, թե ինչպես ՀՀ ԱԺ պատգամավորի մեկ այլ ընկերությունը՝ «Ալեքս Գրիգը», կեղծ օղի արտադրելու համար յոթ անգամ տուգանվելուց հետո ոչ միայն չի վճարել տուգանքը, այլև դատական գանգատարկման ճանապարհով երկարաձգում է գերշահույթի ստացման գործընթացը՝ ոտնահարելով «ոչ միայն օրենքի պահանջը, այլև ՀՀ սպառողների և ռուս-ուկրաինական արտադրողների շահերը»։
Իսկ ահա ՏՄՊՊՀ-ն, «Կապիտալի» տվյալով, «վերջին հինգ տարիների ընթացքում ուսումնասիրություն չի կատարել» մեր հնդկացորենի շուկայում, ուստի դժվար է ասել, թե որևէ մեկն ունի՞ արդյոք գերիշխող դիրք թե ոչ, բայց հաստատ է, որ այս մթերքը նույնպես գրեթե 50 տոկոսով թանկացել է։ Մեկ այլ հետևություն էլ է արել «Կապիտալը»՝ վերլուծելով 325 խոշոր հարկ վճարողների ցանկը. «Որքան շատ է Հայաստանում խոսվում փոքր ու միջին բիզնեսի աջակցության մասին, այնքան շատ է բյուջեն «լցնելու» բեռն առանց հիմնավորման դրվում նրանց ուսերին»։